Беларус, якога двойчы судзілі за адзін здымак, просіць дапамогі

27 верасня 2020 года мінчук Уладзімір Фурман выйшаў на «Народную інаўгурацыю» Святланы Ціханоўскай у Мінску, а праз пяць дзён быў затрыманы і асуджаны на 15 сутак. ГУБАЗіК вылічыў яго праз фота з маршу. Аж праз два гады людзі з аўтаматамі зноў уварваліся ў кватэру мужчыны праз той самы здымак, распавядае «Белсат».

«Уварваліся са сваймі шчытамі і аўтаматамі, паклалі мяне на падлогу каля лазенкі. Я ўвогуле не разумеў, што адбываецца. Тыцкаюць мне гэтую фотку. Я кажу ім, што адбыў ужо за яе пакаранне. А яны мне: адбыў за мітынг – цяпер пойдзеш у турму за перакрыццё дарогі паводле 342 артыкулу. ГУБАЗіК асабліва не цікавіла, што бяруць чалавека два разы за адное і тое ж. І павезлі мяне ў Следчы камітэт…» – расказвае Уладзімір Фурман.

Сядзеў з Мажэйкам і Тампалам

Уладзімір сцвярджае, што следчая, якая вяла ягоную справу, адмыслова «пераблытала» дату «ўчынення злачынства», каб усё выглядала больш-менш «законна». Бо сам Уладзімір ужо сядзеў у СІЗА № 1 на Валадарскага і закрываць справу было не ў правілах СК. Хоць адвакатка казала Уладзіміру, што следчая ведала пра «памылку».

На Валадарцы Уладзімір Фурман правёў да суда тры месяцы. Расказвае, што па дарозе ў суд перасякаўся і размаўляў з палітзняволеным журналістам Генадзем Мажэйкам, якому прысудзілі тры гады калоніі. Сядзеў з мастаком Генадзем Драздовым (асуджаны на тры гады калоніі), Канстанцінам Шышком ды іншымі палітычнымі вязнямі.

Некаторы час быў у камеры з грамадзянінам Польшчы Робэртам Тампалам, аб прысудзе якому стала вядома толькі нядаўна (тры гады калоніі за абразу Лукашэнкі).

«Ён добра размаўляе па-расійску. Расказваў мне, як яго затрымлівалі. Аказалася, Робэрта затрымалі на Камароўцы, калі ён купляў яйкі. Проста падышлі да яго і сказалі прайсці з імі. А калі пабачылі ягоны небеларускі пашпарт, разгубіліся і пачалі камусьці званіць. Але пагаварылі і павезлі яго да нас. Вось мы з ім у камеры некаторы час разам сядзелі», – адзначае Уладзімір.

У карцары – з Дзянісам Варозавым

Уладзімір Фурман згадвае, што людзей, якіх прывозілі з Акрэсціна на Валадарку, адразу кідалі ў карцар – па 10 чалавек (карцар разлічаны на аднаго вязня). Там сустрэў аднаго з маладзёнаў, якія вывесілі ў мінскай Вяснянцы вялікі бел-чырвона-белы сцяг і сцяг Украіны. Гэта быў палітычны вязень Дзяніс Варозаў, якога сілавікі жорстка збілі пры затрыманні. На той момант сляды пабояў на ягоным целе ўжо не былі відаць – толькі ад кайданкоў:

«Але людзі мне апавядалі, што, калі яго прывезлі, на ім не было жывога месца. Нават на Акрэсціна яго не хацелі браць – напалову мёртвага. Проста суцэльнае мяса. Білі, здзекаваліся з яго, пісталет да галавы прыстаўлялі. Таксама гаварылі, што да Дзяніса ў камеру сам міністр Іван Кубракоў прыходзіў на гутарку».

Дзянісу Варозаву прысудзілі пяць гадоў калоніі ўзмоцненага рэжыму.

«Цяпер плачу толькі ад шчасця». Беларуска на пятым месяцы цяжарнасці пераплыла раку, каб уцячы ад лукашыстаў

«Бо ўжо не ведаеш, чаго чакаць ад людзей рэжыму»

1 снежня 2022 года Уладзіміра Фурмана прызналі вінаватым паводле артыкулу 342 КК і засудзілі на тры гады «хіміі». Калі выйшаў на волю з Валадаркі, не стаў чакаць, пакуль прысуд набудзе моц, і пры падтрыманні «BYSOL» эвакуяваўся з Беларусі.

Кажа, трэці суд за адзін і той жа фотаздымак – гэта было б ужо занадта. Не адчуваў сябе ў бяспецы.

Апошнія некалькі гадоў да другога затрымання Уладзімір Фурман працаваў фрылансерам у сферы IT. У Польшчы працуе зваршчыкам. З заробленых грошай пакідае сабе толькі на неабходнае для жыцця – харчаванне і аплату жытла. Астатняе дасылае ў Беларусь самым блізкім, каб здолелі пагасіць крэдыты і выехаць у Польшчу (у тым ліку грошы са збору «BYSOL»). Праз доўг за крэдыты, які зʼявіўся падчас перабывання Уладзіміра ў СІЗА, сваякі пакуль невыязныя.

Кажа, грошы, якія былі ў ягоным электронным гаманцы, цяпер у ГУБАЗіКу. Сямʼі, каб пагасіць крэдытныя запазычанасці, бракуе 1500 еўра.

«І я цяпер тут думаю, што ўжо лічыцца кожны дзень. Вельмі хочацца, каб яны прыехалі як мага хутчэй і каб мы былі разам. Бо ўжо не ведаеш, чаго чакаць ад людзей рэжыму. У іхных галовах творыцца абсалютны шал. Няма ніякай логікі ўва ўсім, што яны чыняць.

Усё горш і горш. Усё страшней і страшней. Здаецца, усё ўпіраецца ў аднаго толькі чалавека», – дзеліцца эмоцыямі суразмоўца.

24 сакавіка 2023 года прозвішча Фурмана з’явілася ў пераліку грамадзянаў, якія «маюць дачыненне да экстрэмісцкай дзейнасці».

Уладзімір прызнаецца, што яму няёмка прасіць падтрымання ў іншых беларусаў, але будзе вельмі ўдзячны за кожную капейчыну дапамогі. Каб падтрымаць Уладзіміра Фурмана фінансава, «Белсат» прочіць звязацца з чат-ботам.