«БелГазета» падпіша тысячу чыноўнікаў, каб яны «ўключылі мазгі»

Штотыднёвік «БелГазета» пры дапамозе краудфандынга сабраў сродкі для падпіскі на выданне чыноўнікаў, каб яны, па задуме арганізатараў акцыі, змаглі «ўключыць мазгі».

Як паведаміў БелаПАН дырэктар «БелГазеты» Кірыла Жываловіч, кампанія праходзіць пад слоганам: «Падпішыся сам, уключы мозг чыноўніку і атрымай каштоўныя падарункі!».
За два дні да заканчэння тэрміну кампаніі на рэалізацыю праекта сабрана больш за 6,65 тыс. рублёў (133% ад заяўленай сумы збору — 5 тыс. рублёў).
Кампанію падтрымалі драматург і сцэнарыст Андрэй Курэйчык, палітолаг Уладзімір Мацкевіч, грамадскі актывіст Зміцер Дашкевіч, мастак Васіль Пачыцкі, палітыкі Сяргей Скрабец і Мікалай Статкевіч.
Па словах Жываловіча, Статкевіч асабіста аформіць падпіску для Аляксандра Лукашэнкі, Курэйчык — для намесніка міністра культуры Ірыны Дрыга, Пачыцкі — для старшыні Савета Рэспублікі Міхаіла Мясніковіча, Скрабец — для прэм'ер-міністра Андрэя Кабякова.
Усяго плануецца падпісаць на «БелГазету» тысячу чыноўнікаў і дзяржслужачых.
naviny.by