Больш за 110 чалавек былі затрыманыя ў Беларусі ў пятніцу — праваабаронцы

У пятніцу ў Мінску і іншых гарадах Беларусі праваахоўнікамі было затрымана больш за 110 чалавек, паведамілі ў незарэгістраваным у краіне праваабарончым цэнтры "Вясна".

Так, па дадзеных цэнтра некалькі дзясяткаў людзей былі затрыманыя ў Мінску падчас ланцугоў салідарнасці, падчас якіх людзі на вуліцах сталіцы спрабавалі ўшанаваць памяць памерлага напярэдадні Рамана Бандарэнкі.
Сярод затрыманых праваахоўнікамі апынуліся некалькі лекараў, кіраўнік праектаў партала tut.by, лідар гурта "Стары Ольса" і акцёр НАДТ ім. Горкага.
Акрамя таго, у Косава падчас экскурсіі была затрыманая турыстычная група з Салігорску, 54 чалавекі. Частка з іх - стачкамаўцы "Беларуськалія". Затрыманых даставілі ў РУУС г. Івацэвічы. Паводле інфармацыі стачкама "Беларуськалія" членаў турыстычнай групы абвінавачваюць ва ўдзеле ў несанкцыянаваным масавым мерапрыемстве.
Таксама затрыманні прайшлі ў Брэсце, Слуцку, Маладзечна, Вілейцы, Ляхавічах, Клецку, Баранавічах, Смаргоні і іншых гарадах Беларусі, адзначылі ў "Вясне".
Як паведамлялася, напярэдадні ў адным з раёнаў Мінска загінуў 31-гадовы Раман Бандарэнка. Увечары 11 лістапада ён выйшаў у двор свайго дома, калі невядомыя ў масках прыехалі здымаць бел-чырвона-белыя стужачкі з плота. Пачалася бойка. Рамана з сілай адштурхнулі, ён стукнуўся галавой. Потым хлопца павезлі на мікрааўтобусе. Праз паўтары гадзіны яго даставілі ў шпіталь з ацёкам мозгу. Была праведзена аперацыя, але малады чалавек памёр 12 лістапада.
Пасля таго, як стала вядома пра гібель Бандарэнка, грамадзяне Мінска зладзілі вечар яго памяці, прынеслі кветкі, запалілі свечкі, правялі хвіліну маўчання. Больш за пяць гадзін аж да паўночы людзі з усяго Мінска прыязджалі на месца здарэння.
interfax.by