БРСМ распавёў аб працы сваіх троляў у інтэрнэце
Беларускі рэспубліканскі саюз моладзі ўзмацніў працу ў сацыяльных сетках і ў благасферы. Пра гэта заявіў 4 красавіка першы сакратар ЦК БРСМ Ігар Бузоўскі на адкрыцці Рэспубліканскага моладзевага інтэрнэт-форуму.
Паводле яго слоў, у інтэрнэце дзейнічаюць 346 супольнасцяў БРСМ у сацсетках, якія аб'ядноўваюць больш за 280 тыс. чалавек, 143 блогі, у тым ліку 97 у Twitter, з агульнай колькасцю
падпісантаў больш за 4 тыс.
Акрамя таго, працуе сістэма аператыўнага рэагавання моладзевых інфармацыйных груп, якая аб'ядноўвае больш за 140 чалавек, пачала працаваць новая версія сайта арганізацыі, перадае БелТА.
Ігар Бузоўскі назваў адным з прыярытэтаў дзейнасці БРСМ у інтэрнэце ўзмацненне палітычнай актыўнасці моладзі, фармаванне пазітыўнага стаўлення да працэсаў, што адбываюцца ў сферы палітычнага, сацыяльна-эканамічнага і культурнага развіцця краіны. У гэтых мэтах, заявіў ён, "БРСМ узмацніў працу ў сацыяльных сетках, блогасферы, на форумах незалежных інтэрнэт-рэсурсаў".
Як паведамляў Тэлеграф, прэзідэнт Беларусі Аляксандр Лукашэнка сваім указам №55 ад 30 студзеня 2014 года працягнуў дзяржфінансаванне Беларускага рэспубліканскага саюза моладзі яшчэ на два гады наперад.