«Чалавек-павук — не беларускі герой». У садках і школах забаранілі «імпартных» персанажаў

Грамадства

Апранаць дзіця на навагодняе свята ў садку ў касцюм Чалавека-павука цяпер нельга. Якія яшчэ абмежаванні прыдумалі чыноўнікі для дзіцячых свят, распавядае «Фл*гшток».

1429717889_2021751014.jpg

У сацыяльных сетках быў апублікаваны ліст аддзела адукацыі Жлобінскага раёна, у якім паведамляецца, што кіраўнікі ўстаноў адукацыі павінны прыняць «вычарпальныя меры па недапушчэнні прапаганды правядзення мерапрыемстваў, якія супярэчаць традыцыйным каштоўнасцям беларускага народа». Прыкладамі такіх мерапрыемстваў былі названы святкаванне Хэлоўіна і апрананне кацюмаў герояў «Хагі вагі».

У лісце таксама пазначана, што забарона ўводзіцца на падставе даручэння Савета Міністраў ад 30 лістапада 2022 года.

Поўны спіс забароненых у дзіцячых садках і школах свят і герояў журналісты паспрабавалі высветліць у Галоўным упраўленні адукацыі Гомельскага аблвыканкама. Падчас званка ва ўпраўленне карэспандэнт выдання прадставіўся бацькам дзіцяці, якое наведвае адну з гомельскіх устаноў адукацыі.

Галоўны спецыяліст аддзела выхаваўчай і сацыяльнай работы Святлана Лучкова пацвердзіла, што забарона сапраўды існуе. Падрабязнасці бацькам павінны расказаць падчас бліжэйшага бацькоўскага сходу. Пры гэтым канкрэтнага спісу рэкамендацый чыноўніца агучыць не змагла:

— Я магу вам сказаць, што гэта, вядома ж, героі мультфільмаў, шырока прадстаўленыя на агульнанацыянальным тэлебачанні. Гэта героі беларускіх і рускіх народных казак. Але не «імпартныя» героі, якія не адпавядаюць беларускім каштоўнасцям. Чалавек-павук — гэта не беларускі герой.

На ўдакладняльнае пытанне аб тым, якое дачыненне да беларускіх каштоўнасцей маюць расійскія героі, чыноўніца ўдакладніла, што ў дадзеным выпадку гаворка ідзе пра герояў савецкіх мультфільмаў.

image63a1a5e0438a7lg.jpeg

Чыноўніца ад Упраўлення адукацыі таксама пацвердзіла, што святкаванне Хэлоўіна ў беларускіх школах з гэтага часу будзе забаронена:

— Хэлоўіны ў дзяржаўных установах не праводзяцца. У сувязі з тым, што Хэлоўіны ўсё ж праводзіліся, хоць і не як грамадскае, а як грандыёзнае мерапрыемства, больш праводзіць гэтыя «святы» не дазволена.

Адказнасць за правядзенне забароненых свят і выбар «няправільных» дзіцячых касцюмаў, па словах чыноўніцы, будзе ўскладзена на кіраўнікоў устаноў адукацыі.