Чарговы «тэракт»? У Дзяржынску аблава, нібыта знойдзена выбуховая прылада

У «мірнай, стабільнай і квітнеючай» Беларусі тыдня не праходзіць, каб «заходнія зламыснікі» не паспрабавалі парушыць спакой грамадзян. То ў Мачулішчах сапсуюць самалёт, то ў Гродна закінуць «тэрарыста» ў парыку. На гэтым тыдні чарга дайшла да Дзяржынска ў Мінскай вобласці.

Сёння раніцай праваабаронцы паведамілі пра ператрусы і затрыманні ў горадзе. Адзначалася, што няпрошаныя людзі са зброяй пагрукаліся прынамсі да пецярых мясцовых жыхароў.

Здавалася б, што тут такога? Кожны дзень лукашэнкаўскія сілавікі гойсаюць па краіне, шукаюць і круцяць нелаяльных, выяўляюць «спячыя ячэйкі экстрэмістаў». Толькі ў апошнія дні аблавы прайшлі ў Полацку, Мёрах, Ляхавічах, Акцябрскім, Бабруйску ды іншых населеных пунктах.

Аднак, выглядае, што ў Дзяржынску адбываецца нешта асаблівае, калі не сказаць надзвычайнае.

Як паведаміў мясцовы тэлеграм-чат, нібыта ў пятніцу ўздоўж дарогі ў Дзяржынску нехта вывесіў сцяжкі. Міліцыя іх паспрабавала зняць, як яна гэта ўмее, але падчас аперацыі супраць сцяжкоў нібыта было знойдзена выбуховае прыстасаванне. Зразумела, што ў горад адразу панаехалі характэрныя бусікі.

Мажэйка: Лукашэнка сказаў, што «пруць экстрэмісты са зброяй», значыць, трэба шукаць

Як адзначае мясцовы паблік, ператрусы, меркавана, праводзяць ува ўсіх людзей, хто, па-першае, у пятніцу праязджаў па той вуліцы — ад раніцы да моманту выяўлення «выбухоўкі», па-другое, быў заўважаны ў пратэснай актыўнасці ў 2020 годзе.

«Да каго пойдуць у трэцюю чаргу, незразумела», — паведамляюць аўтары допісу.

Таксама паведамляецца, што ператрусы прайшлі ўжо ў дзясяткаў мясцовых жыхароў. Вядома пра як найменей тры затрыманні. Што шукааюць сілавікі і за што хапаюць людзей, невядома.

Што да сцяжкоў, то развешаны былі нібыта не толькі бел-чырвона-белыя, але і ўкраінскія і чамусьці «Правага Сектара».

Дзяржынск — невялікі раённы цэнтр непадалёк ад Мінска. У горадзе пражываюць 25 тысяч жыхароў.