Дальнабойшчыка з Бабруйска будуць судзіць па 9 артыкулах за каментары. Пагражае да 8 гадоў

Следчы камітэт паведаміў пра завяршэнне расследавання крымінальнай справы ў дачыненні да 46-гадовага ўраджэнца Бабруйска, які абвінавачваецца па дзевяці артыкулах.

Мужчыне ставяць у віну абразу прадстаўніка ўлады, прэзідэнта, суддзяў, пагрозу прымянення гвалту ў дачыненні да супрацоўнікаў АУС, пагрозы ў дачыненні да прэзідэнта, суддзяў, паклёп і распальванне сацыяльнай варожасці. Пацярпелымі па справе прызнаныя 39 чалавек.

Згодна з матэрыяламі справы, абвінавачаны, які працаваў дальнабойшчыкам, з лістапада 2020 года па кастрычнік 2021 года абражаў прадстаўнікоў улады, выкарыстоўваючы некалькі мабільных тэлефонаў і планшэт. Пры гэтым ён нібыта знаходзіўся ў розных месцах Беларусі і суседніх краін, мяняў нікнэймы, што ўскладняла высвятленне ягонай асобы і затрыманне.

Мужчына знаходзіцца пад вартай. Яму пагражае да 8 гадоў пазбаўлення волі. Справа перададзена пракурору для накіравання ў суд.

Паводле reform.news.