Галоўны санітарны ўрач: Мы ўжо выйшлі на стабільны ўзровень захворвання COVID-19

Пра гэта Аляксандр Тарасенка, намеснік міністра аховы здароўя, галоўны дзяржаўны санітарны ўрач Беларусі, заявіў у эфіры тэлеканала АНТ.

У інтэрв'ю Аляксандр Тарасенка ўзгадаў пра неабходнасць захавання дыстанцыі, мінімальных кантактаў і абмежавання наведвання грамадскіх месцаў. «Вядома ж, рэкамендуем і выконваць масачы рэжым, хоць пэўная частка насельніцтва пярэчыць і лічыць, што гэта не эфектыўна. Але, тым не менш, мы лічым гэта эфектыўнай мерай. І яшчэ адзін аспект ёсць: шмат насельніцтва ў нас хварэе ў схаванай форме, або ў "сцёртай". І, адпаведна, каб чалавек не з'яўляўся шматлікай крыніцай для навакольных, патрабуецца нашэнне маскі».
Па словах Тарасенкі, мутацыя віруса адбываецца, але не вельмі істотна, на цяжкасць захворвання яна не ўплывае.
Галоўны санітарны ўрач лічыць, што вакцынацыя ад каронавіруса будзе эфектыўнай. Але казаць пра гэтую эфектыўнасць можна будзе не раней, чым праз год, калі стане зразумелай працягласць захавання імунітэту пасля вакцынацыі.
Перамовы аб вакцынацыі цяпер актыўна вядуцца з Расійскай Федэрацыяй і не толькі. Чакаецца, што яна пачнецца ў Беларусі ў першым квартале 2021 года.
Пры другой хвалі колькасць тых, хто захварэў, большая, чым пры першай, зазначыў Аляксандр Тарасенка. «Рана пра гэта казаць, але я думаю, што мы ўжо выйшлі на стабільны ўзровень захворвання. І ў залежнасці ад таго, як пройдуць святочныя выхадныя дні, Новы год, Каляды, можна будзе казаць ужо потым аб паступовым зніжэнні захворвання насельніцтва па ўсёй рэспубліцы».