Гаспадар бел-чырвона-белай хаты трымае сухую галадоўку

Гаспадар бел-чырвона-белай хаты Анатоль Каханчык, асуджаны на 25 сутак арышту, трымае сухую галадоўку, паведамляюць праваабаронцы

Сталі вядомыя падрабязнасці арышту жыхара Полацка Анатоля Каханчыка, якога пакаралі 25-сутачным арыштам па арт. 24.23 КаАП (несанкцыянаванае пікетаванне). Для адбыцця пакарання мужчыну перавялі з Полацка у Віцебск.

Паведамляецца, што Анатоль, як і абяцаў, трымае сухую галадоўку.

Нагадаем, год таму мужчына пафарбаваў бацькоўскую хату ў вёсцы Алёшча Полацкага раёну ў нацыянальныя колеры: намаляваў на сценак дзве белыя і чырвоную палосы, а ў акне павесіў Пагоню. Праз пэўны час яго асудзілі за гэта як за правядзенне несанкцыянаванага пікету, а потым пагражалі крымінальнай справай як за нібыта злоснае хуліганства:

— Я сказаў, што ледзь толькі вы распачнеце крымінальную справу або адміністратыўную, я ў той самы дзень і ў тую самую гадзіну пішу заяву на сухую галадоўку.