Хронікі пераследу ў Беларусі за 3 жніўня

Расказваем, што адбылося сёння ў палітычным жыцці краіны.

Ілюстрацыйнае фота Дзмітрыя Дзмітрыева

Ілюстрацыйнае фота Дзмітрыя Дзмітрыева


Стала вядомая дата першага судовага пасяджэння па справе палітзняволенага Дзяніса Івашына. Суд над журналістам пачнецца 15 жніўня.

Палітзняволенай журналістцы Ірыне Слаўнікавай прысудзілі 5 гадоў пазбаўлення волі. Суддзя Мікалай Доля прысудзіў Ірыне на год больш, чым запытваў пракурор.

Грамадскі актывіст Павел Вінаградаў, верагодна, захварэў у турме на сухоты. Палітвязня перавялі ў спецыялізаваную калонію. У ліпені ў Паўла выявілі пляму на лёгкім, курс антыбіётыкаў паляпшэння не прынёс.

Навіны з судовага працэсу па справе «аб захопе дзяржаўнай улады»: стала вядома, што юрыст Юрась Зянковіч пайшоў на здзелку са следствам, даў прызнальныя паказанні і «выкрыў іншых удзельнікаў змовы». Нагадаем, з пяцярых фігурантаў справы сваю віну ні па адным пункце абвінавачання не прызнаў толькі кіраўнік Партыі БНФ Рыгор Кастусёў. Астатнія прызналі сябе вінаватамі, іх паказанні зачытваліся ў судзе.

Сёння ў Гродне скончылі разгляд справы палітзняволенага музыкі Юрыя Грыгера. Яго абвінавачвалі ў «абразе прадстаўніка ўлады». Суддзя Руслан Гурын зняў абвінавачанні, і палітвязня выпусцілі ў зале суду.

Палітзняволеная Алена Гнаук, якую неаднаразова затрымлівалі і змяшчалі за краты, ужо месяц знаходзіцца ў карцары. У чэрвені жанчыне прысудзілі тры з паловай гады калоніі — і, відаць, адразу ж змясцілі яе ў карцар.

У Мінску затрымалі дырэктарку турыстычнай фірмы «Віяпаль» Галіну Патаеву. Па яе прыйшлі пасля фактычнага даносу праўладнай актывісткі Вольгі Бондаравай, якая апублікавала падборку скрыншотаў са старонкі Патаевай, дзе былі бчб-сцягі, і заклікала ГУБАЗіК «разабрацца».

70-гадовага жыхара Нясвіжа Васіля Дземідовіча абвінавачваюць у «60 фактах злачыннай дзейнасці» па чатырох артыкулах Крымінальнага кодэкса. Мужчына прызнаў сваю віну. Па сукупнасці артыкулаў яму пагражае вялікі турэмны тэрмін.

Сілавікі зладзілі аблаву ў Пінску. Паводле даных праваабаронцаў, затрыманыя як менш пяць чалавек, сярод якіх — актывісты Алесь Рамановіч і Дзяніс Сядых.

Папаўненне ў спісе «экстрэмістаў»: у Беларусі «экстрэмісцкімі» прызнаныя Youtube-канал «Нашай Нівы» і сацсеткі ўкраінскага палітычнага дзеяча Аляксея Арэстовіча. 

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: