Польшча абяцае жорсткі адказ з-за прысуду журналістцы TVP

Сёння раніцай, 4 жніўня, МЗС Польшчы выклікала часовага паверанага РБ з нагоды прысуду, вынесенага журналістцы TVP Ірыне Слаўнікавай.

Ірына Слаўнікава. Малюнак politvyazynka

Польскі бок выказвае рашучы пратэст і патрабуе вызвалення журналісткі TVP, а таксама іншых людзей, якія незаконна пазбаўленыя волі ў Беларусі, у тым ліку і Анджэя Пачобута, паведамляе Польскае радыё.

Ірына Слаўнікава асвятляла пратэсты ў Беларусі ў 2020 годзе. Разам з мужам Аляксандрам Лойкам яе затрымалі ў кастрычніку 2021 года ў мінскім аэрапорце.

Учора, 3 жніўня, падчас закрытага судовага працэсу Ірыну Слаўнікаву прызналі вінаватай у «стварэнні экстрэмісцкага фарміравання» (ч.1 арт. 361-1 Крымінальнага кодэкса) і ўдзеле ў пратэстах (ч. 1 арт. 342 Крымінальнага кодэкса).

Журналістку TVP судзіў Мікалай Доля, які разглядаў у тым ліку і «справу Ціханоўскага». Ён вырашыў асудзіць Ірыну Слаўнікаву да 5 гадоў калоніі — прытым, што пракурор прасіў для яе толькі 4 гады зняволення.


На прысуд адгукнуўся таксама прэм'ер-міністр Польшчы Матэвуш Маравецкі, які даручыў польскаму МЗС прадумаць рашучы адказ: «Свабода прэсы, слова і бесперашкоднае права на выказванне свайго меркавання з'яўляецца падставовымі». Ён сказаў, што прысуд журналістцы — гэта абсалютны скандал, парушэнне ўсіх цывілізацыйных нормаў, правоў чалавека і журналісцкіх стандартаў. «Гэты непрымальны прысуд сустрэне рашучую рэакцыю Польшчы на міжнароднай арэне», — заявіў Матэвуш Маравецкі.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: