Ігар Аліневіч: «Узаемадапамога — галоўны здабытак пасля 2010 году»

Грамадства

Актывіст анархісцкага руху Ігар Аліневіч даслаў дамоў першы пасля сваіх трыццатых угодкаў ліст.



alinievicz.jpg

Вядома, што ў той дзень, калі Ігару споўнілася 30 гадоў, яго пакаралі карцэрам нібыта за няяўку на вучобу. Маці палітвязня Валянціна Аліневіч, прачытаўшы апошні ліст сына, мяркуе, што ён паспеў напісаць ліст яшчэ да таго, як пайшоў у карцэр. З допісаў сына Валянціна Аліневіч робіць выснову, што Ігар сустракаў свой дзень народзінаў з аптымізмам і нават гумарам. Таксама маці адзначае, што ён думаў не толькі пра сябе, але і пра іншых палітвязняў, у прыватнасці пра актывіста Аляксандра Малчанава, які пасьля выхаду з калоніі аказаўся ў цяжкай сітуацыі, але не застаўся без падтрымкі сяброў і аднадумцаў. Вось якую цытату Валянціна Аліневіч прачытала для Свабоды:

«Сапраўдны патэнцыял чалавека мабілізуецца толькі ў экстрэмальных умовах. Кожнаму карысна пажыць „на прыродзе“. Вось з такімі думкамі сустракаю новыя далягляды. А за Малчанава я рады ў тым плане, што ў бядзе яму адразу дапамаглі. Такая ўзаемнасьць — галоўны здабытак для грамадзтва ва ўсёй гісторыі з 2010 году. У выніку падтрымка і салідарнасць аказваюцца найлепшым пацвярджэннем праўды і сілы нашай справы. У вачах шмат каго з людзей гэта вельмі моцныя аргументы. Таму што ў сённяшні час размежавання і маркоты мала што здольнае аб’яднаць і напоўніць аптымізмам».


Ігар Аліневіч асуджаны на 8 гадоў зняволення паводле абвінавачання ў нападзе на афіцыйныя будынкі. У судзе сваёй віны не прызнаў. Трымаюць палітвязня ў наваполацкай калоніі, якая лічыцца адной з найгоршых паводле экалагічных умоваў.
svaboda.org