Каб аб'явіць зніклага чалавека ў вышук, у праваабаронцы запатрабавалі даверанасць

Лёс асуджанага да вышэйшай меры пакарання Віктара Паўлава, ад якога больш за 6 месяцаў няма ніякіх звестак, пакуль застаецца нявысветленым.

Першы намеснік начальніка Дэпартамента па выкананні пакаранняў МУС РБ Іван Мысліцкі ўхіліўся ад адказу па сутнасці на заяву праваабаронцы Паўла Левінава аб знікненні асуджанага да расстрэлу, паведамляе viciebskspring.org.

Прычына адмовы ў распачынанні пошуку зніклага без вестак Паўлава грунтуецца на тым, што грамадзяне рэалізуюць права на зварот у дзяржаўныя органы асабіста або праз сваіх прадстаўнікоў. На думку міліцэйскага дэпартамента, Левінаў павінен быў узяць даверанасць, каб прадстаўляць інтарэсы зніклага, а затым звярнуцца ў праваахоўныя органы з заявай аб знікненні чалавека.

 «Згодна з патрабаваннямі артыкула 12 Закона, да пісьмовых зваротаў прыкладаюцца дакументы, што пацвярджаюць паўнамоцтвы асоб, якія звяртаюцца ад імя іншых грамадзян. Дакументы, якія пацвярджаюць паўнамоцтвы прадстаўляць інтарэсы асуджанага Паўлава В.А., не прыкладзены», — паведаміў Мысліцкі праваабаронцу прычыну адмовы аб'явы зніклага чалавека ў вышук.

Праваабаронца чакаў такога павароту падзей. Цяпер ён шукае прававыя магчымасці і працэсуальныя працэдуры, каб дагрукацца да чыноўнікаў Міністэрства ўнутраных спраў краіны і канчаткова высветліць лёс асуджанага да расстрэлу Віктара Паўлава.