Каля КДБ у Мінску затрыманыя журналісты

Супрацоўнікі заяўляюць, што яны вязуць журналістаў для праверкі іх пасведчанняў. На пытанне, у якое РУУС вязуць, супрацоўнікі не адказалі, заявіўшы, што гэта можа сказаць «старэйшы». Паводле папярэдняй інфармацыі, карэспандэнтаў вязуць у Заводскі РУУС.

Сярод затрыманых-журналіст TUT.BY Алена Талкачова, журналісты тэлеканала «Белсат» Галіна Абакунчык, Кацярына Андрэева, Антон Сяліцкі, Ігар Ільяш і фотакарэспандэнт агенцтва ТАСС у Менску Наталля Фядосенка.
У МУС высвятляюць прычыну затрымання.
Нагадаем, сёння ў 16 гадзін каардынатар штаба Бабарыкі Марыя Калеснікава планавала падаваць у КДБ хадайніцтвы аб змене меры стрымання Віктару Бабарыку.
Яна папрасіла неабыякавых беларусаў выступіць паручыцелямі для змены меры стрымання для Віктара Бабарыкі.
— Ніхто не можа быць прызнаны вінаватым без прысуду суда, які ўступіў у сілу. Гэта права гарантаванае нам Канстытуцыяй. Гэта называецца прэзумпцыя невінаватасці. Мы лічым Віктара Бабарыку невінаватым. Але яшчэ больш непрымальнае рашэнне — гэта заключэнне яго пад варту. І мы будзем працягваць змагацца з такой мерай усімі законнымі спосабамі, — гаворыцца ў заяве штаба.
У хадайніцтве, узор якога штаб Бабарыкі выклаў на сайце, гаворыцца, што «з улікам асабістых якасцяў Бабарыка Віктар Дзмітрыевіч фізічнай пагрозы ці іншай небяспекі для грамадства не ўяўляе, і яго ўтрыманне пад вартай з'яўляецца празмерна строгай мерай». У хадайніцтве просяць меру стрымання ў выглядзе заключэння пад варту ў дачыненні да Бабарыкі замяніць на больш мяккую, у прыватнасці на асабістае даручальніцтва. За парушэнне Віктарам Бабарыкам умоў асабістага паручыцельства на паручыцеля накладваецца грашовае спагнанне ў памеры ад ста да пяцісот базавых велічынь (2700 — 13 500 рублёў).

Паводле tut.by