Камароўскі: забітыя ў Катыні — змагары за польскую свабоду
ХХ стагоддзе не зведала другога такога злачынства, — сказаў прэзідэнт Польшчы ў 75-ю гадавіну катынскага генацыду.
Ля Магілы Невядомага жаўнера ў Варшаве прайшла цырымонія ўшанавання памяці 22 000 польскіх афіцэраў, забітых НКВД у Катыні, Харкаве і Медным.
Браніслаў Камароўскі ва ўрачыстай прамове звярнуў увагу на знакавасць сёлетніх мерапрыемстваў.
Браніслаў Камароўскі: "Мы сустракаемся ў Вялікую пятніцу — важны для ўсяго хрысціянскага свету дзень распяцця Гасподняга. У Вялікую пятніцу мы сабраліся ля Магілы Невядомага жаўнера ў 75-ю гадавіну распяцця эліты польскага народу. Гэтае жудаснае злачынства не забытае. Сталінскім злачынцам не ўдалося сцерці прозвішчы катынскіх ахвяр з памяці нацыі".
Прэзідэнт Польшчы зазначыў, што польская свабода грунтуецца на памяці і праўдзе пра Катынь. "Барацьба за гэтую праўду далей працягваецца", — адзначыў Браніслаў Камароўскі. Ён нагадаў, што сёння за ўсходняй мяжой Польшчы праводзяцца акты агрэсіі. "Гэта патрабуе адзінства і салідарнасці сярод палякаў", — дадаў галава дзяржавы.
75 гадоў таму НКВД пачало масава вывозіць польскіх грамадзян з лагераў у Казельску, Старабельску і Асташкаве. 3 красавіка 1940 г. першыя калоны польскіх афіцэраў выправіліся з Казельска ў Катынь.
Гэта быў пачатак масавых забойстваў, учыненых у Катыні, Харкаве і Медным — там супрацоўнікі НКВД расстралялі каля 22 тысяч польскіх грамадзян, якія трапілі ў палон у выніку агрэсіі СССР на
тэрыторыі Польшчы ў 1939 годзе.