Мясцовая “Талака за справядлівыя і празрыстыя выбары” з’явілася ў Брэсце
5 кастрычніка абмяркоўваліся прыярытэты працы кааліцыі ў вобласці. Ініцыятар стварэння рэгіянальнай кааліцыі, старшыня абласной арганізацыі Аб’яднанай грамадзянскай партыі Уладзімір Вуек патлумачыў:
“Мы маем намер выносіць на абмеркаванне такія пытанні, як Закон аб малым памежным руху, які ў 2010 годзе быў ратыфікаваны, і так і не рэалізаваны, пабудова пешаходнага перахода на мытна-памежным пераходзе “Варшаўскі мост”. Яшчэ адно пытанне — гэта адкрытасць і празрыстасць мясцовых бюджэтаў. Таксама сёння мы вырашылі ініцыяваць сустрэчы з дзейнымі дэпутатамі Палаты прадстаўнікоў”.
Нагадаем, “Грамадзянскі альянс за справядлівыя і празрыстыя выбары для лепшага жыцця “Талака” (такая поўная назва кааліцыі — ЕРБ) быў створаны ў Мінску ў жніўні.
У брэсцкім рэгіёне ў “Талаку” ўвайшлі Аб’яднаная грамадзянская партыя, Беларуская партыя левых “Справядлівы свет”, Незалежны прафсаюз Металістаў, моладзевае крыло АГП “Маладыя дэмакраты”, а таксама тры аргкамітэты: па стварэнні арганізацыі “Маладая Беларусь”, па стварэнні партыі “Надзея” і па стварэнні Партыі Працы.
Кааліцыя адкрытая для далучэння, сказаў спадар Вуек.