Нягледзячы на бязвіз. Беларусы ездзяць у Літву часцей, чым літоўцы ў Беларусь

Бязвізавы рэжым з Беларуссю дзейнічае два месяцы, яго для грамадзян Літвы і Латвіі, увяла Беларусь. Гэтым карыстаецца нямала жыхароў Літвы. Аднак беларусаў у Літву прыязджае нашмат больш, чым літоўцаў у Беларусь, піша Delfi.

У мінулую сераду агенцтва БелТА паведамляла, што з 15 чэрвеня Беларусь наведала больш за 68 700 грамадзян Літвы. Аднак прадстаўнік Службы аховы дзяржмяжы (САДМ) Рокас Пукінскас адзначыў, што беларусаў у Літву прыязджае нашмат больш, чым літоўцаў у Беларусь.

— У траўні грамадзяне Літвы перасякалі мяжу з Беларуссю, больш за 79 000 разоў (гэта паездкі ў абодва бакі). Ёсць і людзі, якія ездзілі па 3-4 разы, мы фіксуем агульную колькасць выпадкаў перасячэння мяжы. Мы не можам вылучыць колькасць асобных людзей, бо адзін і той жа чалавек можа ездзіць шмат разоў за месяц. У чэрвені гэты паказчык складае 96 291, — сказаў Пукінскас. — Мы бачым, што беларуская прапаганда радуецца таму, што да іх едзе шмат літоўцаў, але на справе беларусаў у Літву прыязджае больш.

Напрыклад, у траўні ў абодва бакі мяжу перасеклі больш за 120 000 беларусаў, а ў чэрвені — больш за 137 000.

Ён заўважыў, што ў САДМ няма дадзеных, колькі літоўцаў ездзіць у Беларусь з-за ўвядзення бязвізавага рэжыму. Акрамя таго, паводле яго слоў, літоўцы і раней ездзілі ў Беларусь без візы — яны маглі атрымаць яе на мяжы. Пры гэтым жыхароў краіны перыядычна папярэджваюць аб тым, што такія паездкі могуць уяўляць пагрозу.

— У Беларусь ездзяць у асноўным жыхары памежных раёнаў, суседніх населеных пунктаў, для якіх такія паездкі сталі крыніцай існавання або дадатковага заробку. Справа ў тым, што, калі чалавек, дакументы ў якога ў парадку, перасякае мяжу, у памежнікаў няма падстаў для таго, каб не выпускаць яго, — заўважыў прадстаўнік САДМ.

Са слоў Пукінскаса, беларусы карыстаюцца дзейнымі дагэтуль візамі і ездзяць праз Літву адпачываць за мяжу — праз Медзінінкай накіроўваюцца ў Віленскі аэрапорт. 

— Мы можам зрабіць асцярожны выснову — Літва і Еўрасаюз для беларусаў прывабней, чым Беларусь для літоўцаў. Не трэба выключаць і той факт, што беларусы ездзяць у Літву за пакупкамі, нягледзячы на тое што некаторыя тавары ў Літве даражэй, чым у Беларусі. Але, мабыць, у некаторых людзей ёсць грошы, і яны хочуць іх траціць, — сказаў прадстаўнік САДМ.

Ён не выключае, што некаторыя беларусы прыязджаюць у Літву на адпачынак, аднак дакладна вызначыць прычыну прыезду складана.

— Чалавек можа сказаць, што прыехаў на пахаванне або да сваякоў, але на самай справе едзе да бліжэйшай запраўкі, а потым назад. Паездкі — асабістая справа, такой статыстыкі ў нас ужо няма, — сказаў Пукінскас.

Бязвізавы парадак уезду ў Беларусь дазволілі для грамадзян Літвы і Латвіі 15 красавіка. Пазней ён быў падоўжаны да канца бягучага года. З 1 ліпеня да канца года бязвізавы ўезд і дазволілі грамадзянам Польшчы.