Новая выява на «сцяне Шчоткінай»
На выходных на вядомай ужо "сцяне Шчоткінай" з'явілася новае графіці. Гэта надпіс "Хто дазволіў усім астатнім самім сабе дазваляць".
"Сцяна Шчоткінай" атрымала вядомасць ад першай сацыяльнай выявы — партрэта экс-міністра працы Марыяны Шчоткінай з надпісам, што гэта яна прыдумала падатак на беспрацоўе. Калі работнікі ЖЭСа знішчылі гэты партрэт, на яго месцы з'явіўся надпіс "Вы ж самі ўсё разумееце".
З таго часу невядомыя мастакі спаборнічаюць з ЖЭСам. На сценцы ўжо з'яўляліся партрэты старшыні Савета Рэспублікі Міхаіла Мясніковіча і фраза Марціна Лютара Кінга "Ніколі не забывайце: усё, што рабіў Гітлер у Нямеччыне, было законным".
У іншых месцах горада невядомыя мастакі таксама размяшчалі сацыяльныя выявы: напрыклад, міністра ўнутраных спраў Ігара Шуневіча ў шынялі НКУС, старшыні Белдзяржтэлерадыёкампаніі Генадзя Давыдзькі — у вобразе тэлепузіка.
