Пасля загаду Лукашэнкі Мінгарвыканкам адмяніў сваё рашэнне пра начны «сухі закон»

Мінгарвыканкам сваім рашэннем №4160 ад 2 кастрычніка адмяніў папярэдняе рашэнне, якое з 1 кастрычніка забараняла начны продаж алкагольных напояў і піва. Адпаведны дакумент за подпісам старшыні Мінгарвыканкама Андрэя Шорца апублікаваны на Нацыянальным прававым інтэрнэт-партале, паведамляе Еўрарадыё.

Паведамляецца, што рашэнне адменена на падставе пункта 1 артыкула 40 Закона Рэспублікі Беларусь ад 4 студзеня 2010 года «Аб мясцовым кіраванні і самакіраванні ў Рэспубліцы Беларусь».
Як раней тлумачылі ў Галоўным ўпраўленні гандлю і паслуг Мінгарвыканкама, з ініцыятывай абмежавання рознічнага продажу алкаголю выступіла Міністэрства ўнутраных спраў краіны. Ведамства прапанавала правесці комплексны эксперымент па ўдасканаленні рознічнага гандлю алкагольнай прадукцыяй, а заадно прафілактыку п'янства і равапарушэнняў. У сувязі з гэтым Мінгарвыканкам і прыняў рашэнне аб забароне продажу алкаголю ў крамах з 23.00 да 7.00.
Абмежаванне на продаж алкаголю ўначы павінна было дзейнічаць год — з 1 кастрычніка 2018 да 1 кастрычніка 2019 года. Аднак Лукашэнка цягам сутак загадаў адмяніць гэтае рашэнне, што і было зроблена.