Прайшоў год пасля затрымання эксперткі Таццяны Кузінай. Сутнасць абвінавачванняў дагэтуль невядомая

Сёння год, як у турме знаходзіцца палітолаг, даследчыца, адна з заснавальніц праекта SYMPA (Школа маладых менеджараў у сферы публічнага адміністравання) Таццяна Кузіна, паведамляюць яе калегі.

Таццяна была затрыманая 28 чэрвеня 2021 года ў аэрапорце «Мінск», калі адпраўлялася ў кароткатэрміновую паездку ў Грузію. Ёй выстаўленыя абвінавачванні паводле двух сур'ёзных артыкулаў Крымінальнага кодэкса «Змова з мэтай захопу ўлады неканстытуцыйным шляхам» (ч. 1 арт. 357) і «Заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь» (ч. 3 арт. 361).

Аднак сутнасць абвінавачванняў, прычыны затрымання Таццяны, і тым больш яе ўтрымання пад вартай на працягу такога доўгага тэрміну застаюцца невядомымі. Як і ў выпадку многіх іншых палітычных зняволеных, адвакат Таццяны знаходзіцца пад падпіскай аб неразгалошванні, а ў яе блізкіх і сяброў няма ніякіх магчымасцяў даведацца нейкія падрабязнасці па яе справе. Няясна, калі гэта справа будзе перададзена ў суд ці калі можна (калі можна) чакаць нейкага іншага развіцця падзей. Адзінае, што дакладна можна сказаць пра справу Таццяны — яна не здзяйсняла нічога з таго, што гучыць у артыкулах па яе абвінавачванні. Адзіная «віна» Таццяны ў тым, што яна па-сапраўднаму высакакласная спецыялістка і вельмі добры чалавек.

На жаль, на сённяшні дзень у Беларусі столькі пасаджаных без усялякіх рэальных прычын палітычных зняволеных, што трагічныя гісторыі кожнага/кожнай з іх у нейкай ступені «перакрываюцца» гэтымі складанымі для ўспрымання лічбамі. І кожны дзень мы даведаемся усё новыя і новыя гісторыі затрыманняў, катаванняў, пераследаў і інш. Аднак усе роўна важна расказваць гісторыю кожнага/кожнай з палітычных зняволеных, хоць бы па такім сумным нагодаў, як гадавіны знаходжання ў зняволенні.

Таццяна Кузіна добра вядомая ў экспертнай, акадэмічнай і даследчай супольнасці Беларусі, а таксама сярод тых, хто так ці інакш даўно уцягнуты ў трэці сектар. Хтосьці ведае Таццяну па працы ў Беларускім інстытуце стратэгічных даследаванняў (BISS), дзе яна была адміністрацыйнай дырэктаркай. Хтосьці — па працы ў Еўрапейскім гуманітарным універсітэце (ЕГУ), калі ён быў яшчэ ў Мінску ці ў першыя складаныя гады пераезду ў Літву, калі Таццяна дапамагла як з узнаўленнем універсітэта пасля яго палітычна матываванага закрыцця ў Беларусі ў 2004 годзе, так і многім студэнтам і супрацоўнікам з рашэннем розных пытанняў. Хтосьці ведае Таццяну як экспертку і даследчыцу, якая працуе з многімі цікавымі тэмамі, прычым не толькі на нацыянальным, але і міжнародным узроўні. Многія сустрэлі і ведаюць Таццяну па SYMPA, па яе даследаваннях аб грамадзянскай супольнасці і дзяржаўным кіраванні, па яе лекцыях аб грамадзянскім удзеле і ўдзеле ў розных дыскусіях і абмеркаваннях.

Сёння, у дзень, калі спаўняецца год з таго моманту, як Таццяну, якая ніколі не рабіла нічога дрэннага, затрымалі ў аэрапорце, важна падумаць пра яе. Расказаць тое добрае і важнае, што трэба ведаць пра яе «гораду і свету». Важна ведаць і памятаць, што рэпрэсіі супраць як асобных экспертаў/экспертак, так і даследчых цэнтраў у Беларусі маюць сістэмны характар. Большасць раней вядомых арганізацый (уключаючы SYMPA) ліквідаваныя або знаходзяцца ў працэсе ліквідацыі, а пад следствам і ў зняволенні знаходзяцца добра вядомыя прадстаўнікі/прадстаўніцы экспертнай супольнасці, уключаючы асуджанага да пяці гадоў узмоцненага рэжыму філосафа Уладзіміра Мацкевіча, экспертку Валерыю Касцюгову, якая знаоходзіцца ў СІЗА, асуджаную да двух з паловай гадоў «хіміі» сацыёлага Таццяну Вадалажскую і інш.

Самы просты спосаб падтрымаць Таццяну Кузіну і іншых палітвязняў — гэта напісаць ім ліст, адправіць паштоўку ці тэлеграму. Таксама можна зрабіць сімвалічны грашовы пераклад або адправіць бандэроль. Гэта дапамагае нашым несправядліва зняволеным сябрам і калегам трымаць сувязь са знешнім светам і атрымліваць сігналы аб тым, што мы разам з імі.

Адрас для лістоў: 220030, г. Мінск, вул. Валадарскага, 2, СІЗА-1, Кузіна Таццяна Сяргееўна.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: