Рэдактара «Борисовских новостей» пакаралі за інфармацыю пра Марш абураных беларусаў

Суд Барысаўскага раёна 1 снежня разглядзеў адміністрацыйную справу галоўнага рэдактара недзяржаўнай рэгіянальнай газеты «Борисовские новости» Анатоля Букаса.

Анатоля Букаса судзілі за “парушэнне парадку арганізацыі альбо правядзення масавых мерапрыемстваў” (ч. 1 арт. 23.34 КаАП Рэспублікі Беларусь ). 
Падставай для пачатку адміністрацыйнага працэсу стала інфармацыя, апублікаваная ў газеце ў артыкуле “Рассерженные люди выйдут на площадь” (№ 40 (1324) ад 4 кастрычніка 2017 г.): “Відэаролік заканчваецца заклікам паўдзельнічаць у чарговым Маршы раззлаваных беларусаў 2.0, які плануюць правесці лідары Беларускага нацыянальнага кангрэса 21 кастрычніка ў 14 гадзін на Кастрычніцкай плошчы ў Мінску”.
З гэтай нагоды 20 лістапада Міністэрства інфармацыі вынесла пісьмовае папярэджанне рэдакцыі газеты “Борисовские новости” аб парушэнні арт. 38 Закона  Беларусь “Аб сродках масавай інфармацыі” (“Інфармацыя, распаўсюд якой у сродках масавай інфармацыі забаронены”).
А 28 лістапада галоўнага рэдактара “Борисовских новостей” Анатоля Букаса выклікалі ў РУУС Барысаўскага раёна для правядзення працэсуальных дзеянняў па справе аб адміністрацыйным правапарушэнні, звязанай з вынесеным Мінінфармацыі пісьмовым папярэджаннем. Пратакол аб адміністрацыйным правапарушэнні быў складзены супрацоўнікам міліцыі 29 лістапада і прадстаўлены для азнаямлення Букасу на наступны дзень.
У судзе Анатоль Букас сваю віну не прызнаў, указаўшы, што не з’яўляецца суб’ектам правапарушэння ў адпаведнасці з нормай, прадугледжанай ч. 1 арт. 23.34 КаАП Рэспублікі Беларусь (яе санкцыя прадугледжаная для ўдзельнікаў масавых мерапрыемстваў).
Тым не менш, суд палічыў віну рэдактара даказанай і пакараў яго штрафам у памеры 15 базавых велічыняў.
Галоўны рэдактар газеты “Борисовские новости” мае намер абскардзіць гэтае рашэнне ў абласным судзе.
Паводле baj.by