Рыгору Кастусёву ў трэці раз адмовілі ў змене меры стрымання на хатні арышт

Паплечнікі старшыні БНФ Рыгора Кастусёва атрымалі датаваны 20 ліпеня ліст ад кіраўніка партыі, які цяпер зноў пераведзены пад варту ў СІЗА КДБ («амерыканка») у Мінску. Палітык паведамляе, што следчыя ўжо ў трэці раз адмовіліся замяніць яму меру стрымання на хатні арышт, нягледзячы на праблемы са здароўем.

Нагадаем, што з прычыны пагаршэння стану здароўя (праблемы з сэрцам, ціскам, ацёкі, дыхавіца) Рыгор Кастусёў з пачатку ліпеня быў пераведзены ў медыцынскі корпус СІЗА МУС на Валадарскага. Паводле слоў палітыка, там умовы дазволілі яму крыху ачуняць ад вельмі суровага рэжыму ўтрымання ў «амерыканцы». Прынамсі, палітык піша, што паспеў надыхацца ўдосталь свежым паветрам. Аднак у сярэдзіне ліпеня дачка Рыгора Кастусёва Кацярына распавяла, што аналізы паказваюць на падазрэнне ў бацькі анкалагічных захворванняў.
Тым не менш, у змяненні меры стрымання палітыку было адмоўлена. У лісце, які датаваны 20 ліпеня, Рыгор Кастусёў адзначае, што кіраўнік следчай групы, які вядзе крымінальную справу, ужо ў трэці раз адмовіў у пераводзе абвінавачанага палітыка пад хатні арышт, адпаведныя хадайніцтвы адваката таксама былі адхіленыя. Пры гэтым аніякіх следчых дзеянняў з удзелам Рыгора Кастусёва пад вартай ужо даўно не праводзіцца. Расследаванне крымінальнай справы па «змове з мэтай захопу дзяржаўнай улады» працягнутае да кастрычніка.
Рыгор Кастусёў у лісце наракае на інфармацыйную ізаляцыю: некаторыя лісты паплечнікаў па партыі так і не даходзяць да адрасата па незразумелых прычынах. Дазволу на размяшчэнне ў камеры тэлепрыёмніка Рыгору Кастусёву адміністрацыя СІЗА па-ранейшаму не дае. «Інфармацыйны вакуум: ні тэлевізара, ні газет», — піша Рыгор Кастусёў у лісце ад 20 ліпеня.
Напісаць ліст падтрымкі старшыні БНФ у зняволенні можна на гэты адрас:
220050, г. Мінск, Галоўпаштамт, абаненцкая скрыня 8, Кастусёву Рыгору Андрэевічу