Сацапытанне: 68 адсоткаў беларусаў лічаць тэлебачанне крыніцай фэйкаў

«Digital Skills Coalition» прадставіла даныя даследавання «Медыяспажыванне і медыяграматнасць у жніўні 2021».

Што чытаюць і глядзяць беларусы

Гэта даследаванне інтэрнэт-аўдыторыі, праведзенае па гібрыднай тэхналогіі, якое ахапіла беларусаў як у сталіцы, так і ў рэгіёнах. Выбарка апытаных — 1208 чалавек, іх узрост — 18-74 гады.

Найчасцей людзі атрымліваюць інфармацыю з інтэрнэт-СМІ і сайтаў

Асноўнай крыніцай інфармацыі ўдзельнікі даследавання назвалі інтэрнэт-СМІ і сайты. На другім месцы рэспандэнты ўказалі сацыяльныя сеткі, трэцяе месца — гэта навіны ад знаёмых і калег, на чацвёртым месцы — тэлеграм-каналы, і толькі на пятым — тэлебачанне.

Паводле аўтараў даследавання, «тэзіс, што людзі атрымліваюць інфармацыю ў асноўным з тэлеграм-каналаў, не адпавядае рэчаіснасці».

Пры гэтым дзве траціны апытаных глядзяць тэлебачанне тры разы на тыдзень. Больш глядзяць расійскія каналы, чым беларускія.

У інтэрнэце беларусы таксама чытаюць не толькі беларускія СМІ — яшчэ міжнародныя і расійскія.

Самая папулярная сацыяльная сетка — «Укантакце»

«Укантакце», паводле даных даследавання, — лідар сярод беларусаў па папулярнасці ў атрыманні інфармацыі. Яго выкарыстоўваюць 63% апытаных. На другім месцы Instagram, на трэцім — «Одноклассники», на чацвёртым — Facebook, на пятым — TikTok.

Telegram па папулярнасьці дагнаў Viber

Што да мэсенджараў, то першае месца па папулярнасці падзялілі паміж сабой Viber (выкарыстоўваюць 66%) і Telegram (66%), далей ідзе WhatsApp (28%), мэсенджар Facebook (14%) і Skype (13%).

18% наогул не выкарыстоўваюць мэсенджары як крыніцу інфармацыі.

90% лічаць, што СМІ іх падманваюць

У межах даследавання ў беларусаў запыталіся, ці не падаецца ім, што СМІ іх падманваюць. На гэтае пытанне 90% адказалі станоўча. Каб спраўдзіць інфармацыю, людзі шукаюць пацвярджэння на міжнародных сайтах, пасля на расійскіх і толькі потым — на беларускіх.

51% апытаных лічаць, што могуць адрозніць фэйк ад праўдзівай інфармацыі. Траціна рэспандэнтаў не ведаюць, ці могуць адрозніць фэйк ад праўды.

Абсалютным лідарам сярод крыніц фэйкавых навін людзі назвалі тэлебачанне — такіх 68%. Але тут трэба ўлічваць: шмат у якіх выпадках маюцца на ўвазе расійскія тэлеканалы.

Сацыяльныя сеткі — крыніца фэйкаў на думку 48% апытаных, друкаваная прэса — 39%, інтэрнэт-СМІ — 35%, тэлеграм-каналы — 31%, форумы і блогі — 28%, радыё — 26%.

Людзі думаюць, што найменшая крыніца фэйкаў — інфармацыя ад знаёмых, сяброў і калег. Крыніцай фэйкаў іх назвалі толькі 16% апытаных.
Паводле «Свабоды».