Сімфонія «Курапаты» павінна гучаць у Народным мемарыяле

Сімфонія №4 заслужанага дзеяча мастацтваў Беларусі, кампазітара Кіма Цесакова павінна прагучаць у Курапатах напярэдадні восеньскіх «Дзядоў», заявіла беларуская музыка Алена Кісялёва 17 чэрвеня пад час талакі ў Народным мемарыяле.

Нагадаем, што нядаўна мы публікавалі матэрыял Алены Кісялёвай пра выбітнага беларускага кампазітара — аўтара адзінага твору айчыннай класічнай музыкі, прысвечанага Курапатам.

Сімфонія з посьпехам выконвалася ў Беларусі і шэрагу замежны краінаў. Сусветна вядомы дырыжор, народны артыст СССР Яўген Святланаў назваў музыкай сусветнага ўзроўню сімфонію Кіма Цесакова.

Напрыканцы лета грамадская ініцыятыва “Эксперты ў абарону Курапатаў” звернецца да міністра культуры Барыса Святлова з просьбай падтрымаць прапанову Алены Кісялёвай і арганізаваць у Народным мемарыял выступ Дзяржаўнага акадэмічнага сімфанічнага аркестру Рэспублікі Беларусь з сімфоніяй № 4 “Курапаты” Кіма Цесакова.

У талацы, арганізаванай грамадскай ініцыятывай “Эксперты ў абарону Курапатаў” пры падтрымцы “Маладога Фронту”, удзельнічалі іх актывісты, а таксама сябры КХП-БНФ і ветэраны беларускага нацыянальнага адраджэння.

Яны пазначылі такія аб’екты гістарычнай тапаграфіі Куропатаў, як месца каля варотаў у плоце, дзе знаходзілася будка ахоўнікаў , а таксама канец грунтавога ўчастку “Дарогі смерці” на полі паміж Курапатамі і Экспабелам. Паколькі месца, дзе пачынаўся грунтавы ўчастак “Дарогі смерці”, было распахана, на наступнай талацы ў Курапатах гэтае месца з дапамогай адпаведных планаў і спецыялістаў будзе адноўлена і пазначана.

Апроч таго, мінчане-сваякі ў гонар ахвяры сталінізму Аляксея Качаноўскага ўзвялі ва ўрочышчы мемарыяльны крыж, грамадскія актывісты даводзілі да ладу і палолі кветнікі, разбітыя раней, чысцілі Народны мемарыял ад смецця і сухога галля, зносілі да дарогаў распіленыя дрэвы.

Апошняя з серыі летніх талокаў па пазначэнні аб’ектаў гістарычнай тапаграфіі Курапатаў пачнецца ва ўрочышчы 25 чэрвеня а 12.00 на Галгофе.