«Справа аб змове»: пад канвоем дапытваюць палітзняволеных прафсаюзнікаў

На суд па «справе аб змове» 10 жніўня выклікалі затрыманых прафсаюзных лідараў. Пад канвоем у залу былі дастаўленыя кіраўнік Беларускага кангрэса дэмакратычных прафсаюзаў (БКДП) Аляксандр Ярашук і яго намеснік Сяргей Антусевіч.


Ярашук паведаміў, што знаёмы з шэрагам абвінавачаных. Ён сказаў, што ў жніўні 2020-га сустракаўся з Юрыем Зянковічам у сваім офісе ў Мінску. Па яго словах, Зянковіч разглядаў варыянт змены ўлады неканстытуцыйным шляхам і казаў, што трэба прыцягваць сілавікоў, паведамляюць праваабаронцы.

Антусевіч расказаў, што знаёмы з усімі фігурантамі гэтай справы, а ў камеры СІЗА №1 сядзіць разам з Аляксандрам Фядутам. Ён падкрэсліў, што Фядута «інтэлектуальна дапамагае» сукамернікам трымацца.

Па сведчанні Антусевіча, Зянковіч запрашаў яго да ўдзелу ў Zoom-канферэнцыях змоўшчыкаў, але ён адмовіўся. Пракурор зачытаў паказанні Антусевіча на следстве. У іх сцвярджаецца, быццам у 2020 годзе Зянковіч казаў, што хоча легалізаваць свой статус як прэзідэнта, а пазней хацеў стаць прэзідэнтам Беларусі.

Таксама ў судзе зачыталі пратаколы яшчэ аднаго сведкі — грамадзяніна Украіны, прозвішча якога не называлася. Згодна з імі, Зянковіч планаваў прыцягнуць для змовы грошы багатых прадстаўнікоў ізраільскай дыяспары ў ЗША.

Нагадаем, Зянковіч абвінавачваецца паводле ч. 1 арт. 357 КК (змова з мэтай захопу дзяржаўнай улады неканстытуцыйным шляхам), ч. 1 арт. 361-1 КК (стварэнне экстрэмісцкага фармавання і кіраўніцтва ім), ч. 3 арт. 361 КК (публічныя заклікі да захопу дзяржаўнай улады), ч. 3 арт. 130 КК (распальванне сацыяльнай варожасці).

Фядута і Кастусёў — паводле ч. 1 арт. 357 КК (змова з мэтай захопу дзяржаўнай улады неканстытуцыйным шляхам).

Галубовіч і Краўчук — паводле ч. 1 арт. 342 КК (актыўны ўдзел у групавых дзеяннях, якія груба парушаюць грамадскі парадак).

Справу расследаваў Камітэт дзяржаўнай бяспекі Беларусі.

Фігурантамі справы таксама з'яўляюцца таксама псіхіятр Дзмітрый Шчыгельскі, экс-супрацоўнік спецпадраздзялення МУС «Алмаз» Ігар Макар, а таксама Аляксандр Перапечка, Павал Кулажанка і Віталь Макаранка, якія пражываюць за мяжой.

Пяцёх абвінавачаных затрымалі ў сярэдзіне красавіка 2021 года. Праваабаронцы прызналі палітвязнямі ўсіх, акрамя Зянковіча.

Лукашэнка тады заявіў, што яны нібыта рыхтавалі замах на яго і ягоных сыноў.

Кіраўнікі беларускіх прафсаюзаў былі затрыманыя 19 красавіка 2022 года. 19 ліпеня дзейнасць шэрагу незалежных прафсаюзаў была спыненая па пазовах генпракурора Андрэя Шведа.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: