Стала вядома імя аўтара вікіпедыі, на якога завялі справу «за дыскрэдытацыю Рэспублікі Беларусь»

Стала вядома імя берасцейца, якога вінавацяць у дыскрэдытацыі Беларусі праз артыкулы ў вікіпедыі. Гаворка ідзе пра Паўла Пернікава, паведамляе «Еўрарадыё» са спасылка на «М***язону».

Павел Пернікаў рэдагаваў і пісаў артыкулы на вікіпедыі з 2014 года, за гэты час зрабіў больш за 84 тысячы правак. Сярод іншага Пернікаў пісаў пра беларускія СМІ, затрыманага журналіста «Камсамольскай праўды ў Беларусі» Генадзя Мажэйку, журналістку T*T.ВY Кацярыну Барысевіч.

27 снежня 2021 года з яго акаўнта ў вікіпедыі пачаліся дзіўныя праўкі. Напрыклад, з артыкула пра Марыю Калеснікаву была выдаленая інфармацыя пра яе статус палітвязня. З артыкула «Спіс загінулых падчас акцыяў пратэстаў у 2020 і 2021 гадах» цалкам знік цэлы раздзел, а з артыкула «Рэжым Лукашэнкі» знік абзац, дзе гаварылася аб рэзалюцыі Кангрэса ЗША з асуджэннем фальсіфікацый на выбарах, рэпрэсій супраць мірных дэманстрантаў і нелегітымнасць рэжыму.

Пазней вікіпедыя заблакавала акаўнт Пернікава з прычыны верагоднага захопу.

На жыхара Брэста пачалі крымінальную справу па артыкуле 369-1 КК («Дыскрэдытацыя Рэспублікі Беларусь»). Яго справа перададзеная ў суд.

Пад крымінальнай справай знаходзіцца яшчэ адзін вядомы аўтар і рэдактар вікіпедыі — Марк Бернштэйн.