«Трываць, чакаць пераменаў. Жадаю, каб Бык дапамог краіне». Што зычыць беларусам мастацкі кіраўнік Купалаўскага

Мікалай Пінігін спадзяецца на лепшае.

Што пажадаць Беларусі ў 2021 годзе? «Свабода» сабрала пажаданні ад вядомых людзей. Слова — мастацкаму кіраўніку знішчанага ўладамі Купалаўскага тэатру Мікалаю Пінігіну.

У сувязі з каронавірусам ён пажадаў найперш усім беларусам здароўя.

«Астатняе ўсё вы самі ведаеце — ШТО глабальна павінна змяніцца. Трываць, чакаць пераменаў. Але на палітычныя тэмы мы не будзем размаўляць.

Год Пацука скончыўся, наступае год Быка. Жадаю ўсім людзям у наступным годзе, каб Бык дапамог краіне. 2020 — год Пацука, гэта быў дрэнны год для ўсіх: тут і „«карона», і палітычныя падзеі. Спадзяюся, што Бык прынясе краіне штосці новае, таму што ён упарты», — разважае мастацкі кіраўнік Купалаўскага тэатру Мікалай Пінігін.

На пытанне, ці спадзяецца галоўны рэжысэр на вяртаньне большай часткі трупы ў родныя сцены тэатру, Мікалай Пінігін не адказаў.

«У мяне ніякіх прагнозаў няма. Не ведаю, калі Купалаўскі тэатр вернецца. Напэўна, калі зменіцца ўся палітычная сітуацыя ў краіне, тады і вернемся. Са мной ніхто не вёў ніякіх перамоў — ні новы міністр, ніхто. Думаю, з намі і не будуць весці ніякіх перамоваў», — падзяліўся Мікалай Пінігін.