Турэмная рэчаіснасць вачыма Алана Сміта

Зняволены ў Беларусі грамадзянін Вялікабрытаніі прыслаў з калоніі ў Віцьбе новыя малюнкі.

006_2.jpg


Магдалена Валінска, жонка Алана Сміта, брытанскага бізнесоўца, зняволенага ў Беларусі па абвінавачанню ў арганізацыі незаконнай міграцыі, перадала ў "Новы час" яшчэ адну серыю малюнкаў, якія яе муж намаляваў, знаходзячыся за кратамі. Па яе словах, усе яны маюць пад сабой рэальныя здарэнні. Супрацоўнікі калоніі сапраўды ставяцца да Алана па-расісцку, а прыватная размова з консулам немагчымая, нягледзячы ні на якія законы.

001_11.jpg



Яшчэ ў сакавіку гэтага года Алан звярнуўся да старшыні ДВП МУС Алега Маткіна са скаргай, дзе пералічыў парушэнні сваіх правоў: вынесеныя спагнанні, прыніжэнні чалавечай годнасці, забарону насіць цішотку з брытанскім сцягам, адмову прадставіць яму правілы ўнутранага распарадку на ягонай роднай мове і іншыя. Аднак атрымаў адказ ад нам.начальніка ДВП В.А.Мандрыка, згодна з якім ягоны зварот быў пакінуты без разгляду, бо нібыта грамадзянін Вялікабрытаніі мусіць звяртацца ў ДВП толькі на рускай ці беларускай мове.

alan_zvarot.jpg

Пазней на пытанне аб тым, як жа ад можна запатрабаваць выканання правілаў ад іншаземца, калі яны толькі на рускай мове, начальнік аддзела выпраўленчага працэса ПК-3 А.Аўсянік адказаў, што "правілы ўнутранага распарадку былі даведзеныя да Алана Сміта прадстаўніком амбасады Вялікабрытаніі пры паступленні ў папраўчую калонію"...

004_4.jpg


005_2.jpg

Нягледзячы на шматлікія скаргі на турэмнае начальства і высмейванне беларускай улады ў сваіх малюнкаў, Алан вельмі прыязна ставіцца да Беларусі як такой і беларусаў, сцвярджаючы, што гэта выдатныя краіна і цудоўная нацыя, кажа Магда.
З атрада, у якім знаходзіцца Алан, прыбралі ўсіх, хто размаўляе на ангельскай мове: Даічі Ёшыда (ужо вызвалены), калумбійца Гедзі Геральда, а лепшага сябра Алана ў калоніі, Руслана Урманава, увогуле кінулі ў ШІЗА проста за падтрымку стасункаў з брытанцам.


Алан вызваляецца 29 верасня. Вы можаце падтрымаць яго, напісаўшы ліст у калонію па адрасе: Беларусь, 211300 Віцебская вобласць, Віцебскі р-н, п. Віцьба, ВУ ДВП «ВК №3», атрад №6, Алану Сміту.