У Беларусі ўжо 1331 палітвязень. Гэта падлікі праваабаронцаў, насамрэч іх нашмат болей

Праваабаронцы прызналі палітвязнямі яшчэ 12 чалавек. Агулам на сёння палітычных зняволеных у Беларусі 1331, але гэта толькі паводле спісаў праваабарончай супольнасці. Насамрэч рэжым Лукашэнкі трымае ў турмах нашмат болей беларусаў, якія пацярпелі ад палітычных рэпрэсій.

Сёння палітвязнямі прызнаныя 12 мужчын: 

Іван Карабельнікаў — асуджаны па арт. 341 КК за надпіс на плоце «Нет войне» да трох месяцаў арышту;

Арцём Калашук — асуджаны па арт. 368, 369, 391 КК за абразу Лукашэнкі, пракурора і суддзі да  васьмі месяцаў пазбаўлення волі;

Барыс Кайзер — асуджаны па арт. 368 КК за абразу Лукашэнкі да аднаго году і трох месяцаў пазбаўлення волі;

Дзмітрый Крывулька — асуджаны па арт. 368 КК за абразу Лукашэнкі да аднаго году і шасці месяцаў пазбаўлення волі;

Сяргей Ананьеў — асуджаны па арт. 364 КК за выказванне мяркавання, у якім адсутнічалі пагрозы ў дачыненні да супрацоўніка органаў унутраных спраў, да трох гадоў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;

Яўген Ліцкевіч — асуджаны па арт. 369 КК за абразу прадстаўніка ўлады да двух гадоў абмежавання волі з накіраваннем у папраўчую ўстанову адкрытага тыпу, накіраваны для адбыцця пакарання;

Уладзіслаў Шалабанаў — узяты пад  варту па арт. 365 КК за выказванне мяркавання, ў якім адсутнічалі пагрозы ў дачыненні да прадстаўніка ўлады;

Сяргей Сясіцкі — узяты пад варту па арт. 368 КК за абразу Лукашэнкі;

Віталь Грыгель — узяты пад варту па «справе Зельцара»;

Аляксандр Пугач — узяты пад варту па арт. 369 КК і арт. 368 КК за абразу прадстаўніка ўлады і Лукашэнкі;

Сяргей Скакун — узяты пад варту па арт. 391 КК за абразу суддзі;

Павел Варапай — асуджаны да трох гадоў пазбаўлення волі па арт. 368 КК, 369 КК, 188 КК, 391 КК за абразу Лукашэнкі, прадстаўніка ўлады, суддзі і за паклёп.