У Нясвіжы прадаюць старадаўні манастыр бернардынцаў

Адзіны жылы корпус кляштара бернардзінцаў, які захаваўся да нашых дзён у Нясвіжы, выстаўлены на электронныя таргі на пляцоўцы «БУТБ-Маёмасць».

Згодна з умовамі аўкцыёну, новыя гаспадары змогуць змяніць мэтавае прызначэнне будынка па сваім меркаванні, абмежаванні ўстаноўлены толькі на стварэнне вытворчасці. Стартавы кошт трохпавярховага цаглянага будынка плошчай 1381,1 кв. м з улікам зніжкі 80% складае 135 376 рублёў, гэта значыць $ 70 000. Аб'ект з'яўляецца гісторыка-культурнай каштоўнасцю.
Гэты будынак быў узведзены манахамі-бернардынцамі яшчэ ў 1594 годзе (паводле некаторых дадзеных, у 1589-м), аднак у 1864 годзе па рашэнні царскіх уладаў манастыр скасавалі і выкарыстоўвалі як царкву. Пазней, у пачатку мінулага стагоддзя, манастырскія карпусы пераабсталявалі ў ваенныя казармы, а ў перыяд з 1956 па 2002 год у будынку №1 па вул. Гейсіка размяшчаўся штаб 12-га асобнага гвардзейскага Мітаўскага навучальнага палка сувязі.

Па ўмовах электронных таргоў будучы ўласнік абавязаны на працягу двух месяцаў з дня афармлення правоў на зямельны ўчастак і нерухомую маёмасць атрымаць у Нясвіжскім райвыканкаме дазвол на правядзенне праектна-пошукавых работ, а затым распрацаваць праект і ажыццявіць рэканструкцыю аб'екта нерухомасці ў тэрміны, названыя ў праектна-каштарыснай дакументацыі.
Прыняць удзел у электронных таргах, прызначаных на 28 жніўня, маюць права фізічныя і юрыдычныя асобы, а таксама індывідуальныя прадпрымальнікі, у тым ліку нерэзідэнты Рэспублікі Беларусь.
Паводле onliner.by