«Выконвай хуткасны рэжым!»: цяпер беларусы маюць налепку са знакамітай фразай

Стваральнікі налепкі размясцілі інфармацыю аб гэтым у Фэйсбуку.

«Прыдумалі налепку «Выконвай хуткасны рэжым», памер яе 9,5 на 9,5 см. Трэба ж неяк абараняць «хуткасны рэжым» ад русіфікацыі», — напісаў на старонцы ў Фэйсбуку стваральнік крамы symbal.by Павал Белавус. Налепку можна набыць у краме ці замовіць праз інтэрнэт усяго за 1 беларускі рубель.

Фраза «Выконвай хуткасны рэжым» стала знакамітай пасля паслання Аляксандра Лукашэнкі да народа і парламента 19 красавіка 2019.
«Еду па дарозе. Траса, якую называюць прэзідэнцкай. Вывесілі табло «Выконвай хуткасны рэжым». Зразумела мне, што хацеў сказаць аўтар. Але едзе рускі чалавек або рускамоўны беларус: «Выконвай… Хуткасны… Але зразумеў, што «рэжым». Няўжо, думае, зноў пра дыктатуру Лукашэнкі. Што вы хацелі гэтым паказаць? 50% насельніцтва (з запасам кажу) зразумеюць, што патрабуе дарожнік або даішнік… Але астатнія ж не зразумеюць! Прыйшлося вярнуць назву нармальную».
Праз некалькі дзён надпіс пераклалі на рускую.
Паводле facebook.com