За ўшанаванне паўстанцаў Каліноўскага ў Свіслачы актывістаў аштрафавалі амаль на 3,5 тысячы рублёў

Паводле рашэння суду ўдзельнікі традыцыйнага ўшанавання памяці паўстанцаў Каліноўскага ў Свіслачы мусяць заплаціць 3430 рублёў (140 базавых велічыняў) штрафаў, паведамляе Радыё Свабода.

Адміністрацыйныя справы кожнага з актывістаў паасобку разглядаліся ў судзе Свіслацкага раёну больш за месяц.

Штрафы за ўдзел у несанкцыянаванай акцыі атрымалі восем чалавек:

• Віктар Пяцельчыц — 245 рублёў,
• Ігар Банцар, Сяргей Верамеенка, Віктар Сазонаў, Уладзімер Хільмановіч — па 367,5 рубля,
• Ежы Грыгенча — 490 рублёў,
• Юры Глебік, Мікалай Салянік — па 612,5 рубля.
• Віктар Сазонаў і Ўладзімір Хільмановіч — гарадзенскія праваабаронцы. Яны прыехалі на акцыю не як удзельнікі, а як назіральнікі.

Актывісты будуць абскарджваць рашэнне суду.

27 кастрычніка жыхары Гродна і Свіслачы ўшанавалі памяць паўстанцаў Каліноўскага ў горадзе Свіслач і вёсцы Якушоўка Гродзенскай вобласці.
На акцыю сабралася каля 20 чалавек. Яны ўсклалі кветкі і паставілі зьнічы на магіле Віктара Каліноўскага, брата Кастуся Каліноўскага, і мясцовага актывіста Віктара Дзясяціка, які раней апекаваўся пахаваньнямі паўстанцаў.