«Забойцам даюць менш»: што беларусы думаюць пра прысуд Латыпаву

16 жніўня ў Мінску вынеслі прысуд палітвязню Сцяпану Латыпаву. Што пра гэта думаюць родныя Латыпава? Як рашэнні суда каментуюць у інтэрнэце? — высвятляла www.dw.com.

8,5 гадоў калоніі ўзмоцненага рэжыму і 300 базавых велічынь штрафу — такі прысуд вынеслі палітвязню Сцяпану Латыпаву.

«Чарговы прыклад баязлівасці сістэмы», «Забойцам і гвалтаўніках даюць менш», — так каментуюць рашэнне суда беларусы. З заявай, якая асуджае прысуд, выступіла лідар беларускай апазіцыі Святлана Ціханоўская. У сваю чаргу, родныя Латыпава кажуць, што ў бліжэйшым часам будзе пададзеная апеляцыя.

Цётка Латыпава: «Усё шытае белымі ніткамі»

Па словах цёткі палітвязня Галіны Латыпавай, на абвяшчэнні прысуду, як і на папярэдніх пасяджэннях, яе пляменнік знаходзіўся ў клетцы з некалькімі ахоўнікамі: да двух з іх ён быў прыкуты кайданкамі, яшчэ адзін, у бронекамізэльцы, стаяў побач з ім. Як кажа жанчына, у залу суда змаглі трапіць не ўсе, хто прыйшоў на пасяджэнне, у тым ліку не ўпусцілі прадстаўнікоў замежнага дыпкорпуса, якія спазніліся на пару хвілін.

Таксама яна распавяла, што адвакат Латыпава будзе падаваць апеляцыю.

Пасля абвяшчэння прысуду бацьку Сцяпана Латыпава дазволілі спатканне з сынам, а вось Галіна з пляменнікам убачыцца не зможа — ёй у спатканні адмоўлена.

«Сцяпан адчувае сябе нядрэнна, але відаць было, што хваляваўся. Вядома, ён, як і ўсе мы, не згодны з прысудам. Гэта ўсё надуманае і шытае белымі ніткамі. Краіну пазбаўляюць прафесіяналаў, інтэлігентных, разумных людзей, якія любяць сваю справу», — дадае Галіна Латыпава.

Рэакцыя беларусаў: «Ва ўладзе свой «Талібан»

Прысуд, вынесены Сцяпану Латыпаву, выклікаў хвалю абурэння ў беларускім грамадстве. «Забойцам і гвалтаўнікам даюць менш, няма слоў...», «Лёс Сцяпана з болем прайшоў праз сэрцы ўсіх беларусаў», «2 гады хіміі далі істоце, якая выкінула дзіця з акна. І 8,5 гадоў калоніі ўзмоцненага рэжыму далі чалавеку за грамадзянскую пазіцыю», — так рэагавалі людзі на рашэнне суда ў сацсетках і каментарах да публікацый у СМІ.

«Сцяпан Латыпаў атрымаў 8,5 гадоў калоніі ўзмоцненага рэжыму. Чарговы прыклад баязлівасці сістэмы: давайце пасадзім усіх, хто можа нагадаць «прыгажунам» у балаклавах, што такое сапраўдныя мужнасць і высакародства». «Сцяпан Латыпаў. Гэта не бандыт, не крымінальнік. Ён раздаваў на вуліцы кветкі жанчынам. Тут ва ўладзе свой «Талібан», — таксама пісалі беларусы.

«Сёння Сцяпану Латыпаву вынеслі прысуд: 8,5 гадоў калоніі ўзмоцненага рэжыму і штраф 300 базавых. Гэтыя лічбы закліканыя запалохаць нас — але мы не паддадзімся страху. Дзеля Сцяпана і тысяч такіх жа невінаватых людзей, як і ён, мы працягнем рабіць тое, што ў нашых сілах», — напісала ў сваім Instagram лідар беларускай апазіцыі Светла Ціханоўская. Паводле яе слоў, гісторыя Сцяпана Латыпава ілюструе крызіс, у якім аказалася краіна пасля прэзідэнцкіх выбараў.

«Гэта кампанія масавых рэпрэсій — адказ рэжыму на негвалтоўны пратэст, які ахапіў Беларусь са жніўня 2020 года», — мяркуе Ціханоўская. Таксама яна заклікала дэмакратычную супольнасць заставацца верным «нашым агульным каштоўнасцям і прыняць меры».