Зміцеру Паліенку пагражае калонія
ПЦ «Вясна» стала вядома, што на 7 красавіка ў судзе Заводскага раёна Мінска прызначана пасяджэнне па разглядзе пытання аб адмене адтэрміноўкі пакарання Зміцеру Паліенку. Сацыяльнаму актывісту пагражаюць два гады зняволення.
Зміцер Паліенка
На дадзены момант у дачыненні да Зміцера Паліенкі дзейнічае прысуд аб пазбаўленні волі на 2 гады з адтэрміноўкай, вынесены 12 кастрычніка 2016 года судом Цэнтральнага раёна Мінска ў выніку прызнання актывіста вінаватым па артыкуле 364 «Гвалт або пагроза ўжывання гвалту ў дачыненні да супрацоўніка органаў унутраных спраў» і частцы 2 артыкула 343 «Выраб і распаўсюд парнаграфічных матэрыялаў або прадметаў парнаграфічнага характару».
Крымінальную справу, узбуджаную супраць Паліенкі ў сувязі з інцыдэнтам паміж ім і супрацоўнікамі ДАІ падчас велапрабегу “Крытычная маса” 29 красавіка 2016 года ў Мінску, Праваабарончы цэнтр “Вясна” разглядаў як пераслед за ажыццяўленне актывістам гарантаванага яму канстытуцыйнага права на свабоду мірных сходаў, адзначаючы непрапарцыйнасць ужывання гвалту супрацоўнікамі міліцыі пры спыненні акцыі і затрыманнях яе ўдзельнікаў, а таксама ў перыяд следства заяўляў пра непрапарцыйнасць такой меры стрымання як ўзяцце пад варту, у выніку чаго актывіст у чаканні судовага працэсу правёў за кратамі пяць месяцаў.
Пасля вынясення прысуду, у бягучым годзе Зміцер Паліенка неаднаразова прыцягваўся да адміністратыўнай адказнасці ў сувязі са сваёй грамадскай актыўнасцю.
10 сакавіка быў асуджаны судом Маскоўскага раёна Мінска да сямі сутак арышту за “дробнае хуліганства” (артыкул 17.1 КаАП) у выніку затрымання ў Доме правасуддзя, дзе выказаў абурэнне прысудам па так званай "справе антыфашыстаў".
20 сакавіка, пасля затрымання ў ЦІП на Акрэсціна, куды прыйшоў зрабіць перадачу арыштантам, быў асуджаны судом Заводскага раёна Мінска да 15 сутак арышту за мірную акцыю пратэсту супраць будаўніцтва офіснага цэнтра ў Курапатах (ч.3 23.34 КаАП). У дзень заканчэння тэрміну арышту, які Паліенка адбываў у жодзінскім ізалятары, ён на свабоду не выйшаў: як паведамілі яго былыя сукамернікі, актывісту “дадалі” яшчэ 10 сутак арышту, за што — не вядома.
Праваабаронцы мяркуюць, што падставай для перагляду судом пытання аб адтэрміноўцы крымінальнага пакарання магло стаць неаднаразовае прыцягненне актывіста да адміністратыўнай адказнасці. Такім чынам, над Зміцерам Паліенкам навісла рэальная пагроза пазбаўлення волі.