"Альтэрнатыва" звярнулася да мінскіх уладаў з просьбай размясціць на мінскіх вуліцах шыльды з іх гістарычнымі назвамі
17 лютага грамадскае аб'яднанне "Альтэрнатыва" (зарэгістравана ў Латвіі) накіравала гарадскім уладам калектыўны зварот з прапановай усталяваць на 20 мінскіх вуліцах шыльды з указаннем іх гістарычных назваў.
Працэс збору подпісаў сярод мінчукоў
Працэс збору подпісаў сярод мінчукоў
Працэс збору подпісаў сярод мінчукоў
Працэс збору подпісаў сярод мінчукоў
Подпісы
Разам са зваротам чыноўнікам накіравана 1000 подпісаў, якія ў снежні 2014 года – студзені 2015 года сярод мінчукоў збіралі актывісты арганізацыі.
Дадзеная прапанова тычыцца вуліц, якія размешчаны ў гістарычнай часткі беларускай сталіцы – у раёне Нямігі, Верхняга горада, Траецкага прадмесця, стадыёна Дынама, Асмалоўкі, плошчы Незалежнасці, а таксама праспекта Незалежнасці. Сярод іх – вуліца Рэвалюцыйная, Камсамольская, Савецкая, Герцэна, Камуністычная, Ульянаўская, Карла Маркса, Інтэрнацыянальная, Кірава, Чырвонаармейская, плошча Парыжскай камуны і іншыя.
Зварот адрасаваны Мінскаму гарадскому Савету дэпутатаў, Мінгарвыканкаму, а таксама Міністэрству культуры Рэспублікі Беларусь.
Акрамя сабраных подпісаў сярод мінчукоў, актывісты "Альтэрнатывы" стварылі адпаведную электронную петыцыю на сайце www.change.org, таксама адрасаваную гарадскім чыноўнікам, дзе кожны жадаючы можа пакінуць свой голас у падтрымку размяшчэння шыльдаў гістарычных назваў вуліц.
"Мы лічым, што сёння важна папулярызаваць сярод грамадства беларускую гісторыю, падкрэсліваць нашу ідэнтычнасць, таксама сёння неабходныя канкрэтныя крокі ў вяртанні сталіцы яе гістарычнага аблічча, у прыватнасці, у тапаніміцы. Гістарычны цэнтр Мінска павінен перадаваць рознымі спосабамі сваё шматвяковое жыццё, ранейшыя сацыяльныя і культурныя асаблівасці яго жыхароў, у пэўнай меры адраджаць гэты згублены дух. Такім чынам, мы прапануем гарадскім уладам зрабіць крок насустрач павагі гістарычнай памяці, а таксама зрабіць крок у паляпшэнні турыстычнай інфраструктуры Мінска.
Для нас відавочна, увасабленне такой ідэі зробіць турыстычныя маршруты ў цэнтры горада больш інфарматыўнымі і асветніцкімі, таксама гэта стане добрым прыкладам для іншых гарадоў. Фінансавыя затраты на рэалізацыю такой ідэі мінімальныя, а карысць будзе відавочнай", – каментуе матывацыю кампаніі лідар "Альтэрнатывы" Алег Корбан.
Варта адзначыць, падобныя ідэі ўжо ўвасабляліся ў жыццё ў некалькіх правінцыйных беларускіх гарадах.
Прыклад падобных шыльдаў у горадзе Клецк (Мінская вобласць).
Паводле прэс-службы ГА “Альтэрнатыва”