«Арт Сядзіба» спыняе сваё існаванне
Пасля 10 гадоў працы незалежная культурная пляцоўка «Арт Сядзіба» спыняе працу.
Сяргей Доўгушаў падчас «Дня вышыванкі», арганізаванага «Арт Сядзібай». Фота Вікторыі Чаплевай
Інфармацыя пра закрыццё «Арт Сядзібы» з'явілася ў сацсетках пляцоўкі.
«"Арт Сядзібе" 10 гадоў і на гэтым усё?
Праўда, на гэтым усё!
Па прычыне таго, што мы знаходзімся ў стадыі ліквідацыі, а яшчэ неўзабаве прымуць закон аб адказнасці за дзейнасць арганізацый, якія ліквідаваныя, мы прынялі рашэнне не працягваць дзейнасць.
Дзякуем усім, хто быў з намі ўсе гэтыя гады.
Мы вас любім!» — гаворыцца ў паведамленні на старонцы «Арт Сядзібы» ў Фэйсбуку.
За час існавання на пляцоўцы прайшло безліч імпрэзаў з удзелам прадстаўнікоў незалежнай беларускай культуры. «Арт Сядзіба» неаднаразова падвяргалася ціску ўладаў, ёй давялося змяніць некалькі памяшканняў.
Адзін з пачынальнікаў «Арт Сядзібы» Павел Белавус цяпер падазраваны па арт. 342 Крымінальнага кодэкса (Удзел у групавых дзеяннях, што груба парушаюць грамадскі парадак), ён знаходзіцца ў СІЗА-1 на вуліцы Валадарскага ў Мінску.