Унікальную мапу ВКЛ прэзентуюць у Мінску

Прэзентацыя мапы Вялікага Княства Літоўскага, створанай у XVII стагоддзі Томашам Макоўскім, пройдзе ў галерэі «Арт-Беларусь» 8 верасня, напярэдадні святкавання 950-годдзя Мінска.

Мапа Вялікага Княства Літоўскага, якую сёлета набылі ў прыватнага калекцыянера з Беларусі, не проста дэталёва выкананая і багата дэкараваная ў манеры таго часу, але ў ёй таксама апісаны звычаі і абрады жыхароў тэрыторыі княства. Аўтар мапы Томаш Макоўскі – гравёр, картограф, мастак, працаваў пры двары Радзівілаў, стаў стваральнікам мастацкіх майстэрняў па афармленні кніг, складанні і гравіроўцы мапаў у Нясвіжы.
Адмыслова дзеля прэзентацыі сталічны фолк-рок-гурт Re1ikt дасць незвычайны акустычны канцэрт. Прагучаць народныя песні з розных куткоў Беларусі ў арыгінальных апрацоўках, а таксама кампазіцыі паводле твораў класікаў беларускай літаратуры: «Драўляны Дзядок і кабета Інсекта» Яна Баршчэўскага і «Балотны агонь» Якуба Коласа.
Re1ikt – гурт, які працуе ў напрамку world rock, спалучаючы традыцыйны беларускі песенны фальклор з актуальнымі рок-напрамкамі. Re1ikt крэатыўна выкарыстоўвае незвычайныя гітарныя эфекты, а таксама народныя духавыя і перкусійныя інструменты. У кампазіцыях каманды спляліся палескі шаманізм, аўтэнтычны драйв і таямнічы беларускі космас. Калектыў з’яўляецца уладальнікам шэрагу музычных узнагарод у Польшчы і Беларусі, выступаў ва Украіне, у Літве, Расіі.
Галерэя «Арт-Беларусь» (вул. Казлова 3, Мінск, Палац мастацтва), 8 верасня, 19:00.
Уваход: 4 руб.