Беларусь падышла да чырвонай рысы ў адносінах з Грузіяй

Спікер парламента Грузіі Шалва Папуашвілі заявіў, што Беларусь зараз — каля чырвонай лініі ў адносінах з Грузіяй, і выказаў надзею, што беларускае кіраўніцтва не прызнае незалежнасць Абхазіі.

Акцыя пратэсту ў Батумі 28 верасня 2022 года.

Папуашвілі пракаментаваў паездку Аляксандра Лукашэнкі ў Абхазію і назваў «абсалютна недапушчальным», калі лідар іншай краіны заязджае на тэрыторыю Грузіі без узгаднення з грузінскімі ўладамі.

Спікер парламента нагадаў, што з гэтай нагоды з боку Тбілісі «быў зроблены вельмі рэзкі дыпламатычны крок, МЗС выклікаў беларускага амбасадара, запатрабаваў ад яго тлумачэнняў, і цяпер МЗС чакае гэтых тлумачэнняў».


Учора ў Грузіі адбыліся акцыі пратэсту ў адказ на «неафіцыйны візіт» у непрызнаную Абхазію Аляксандра Лукашэнкі. У Тбілісі на ёй спалілі фатаграфіі Пуціна і Лукашэнкі. А беларусы Батумі заявілі, што цалкам падтрымліваюць тэрытарыяльную цэласнасць Грузіі. «Абхазія — гэта Грузія, Цхінвальскі рэгіён — гэта Грузія. І па-іншаму не можа быць! Лукашэнка відавочна хоча запэцкаць у крыві і беларусаў, гэта трэба спыніць!»

Паўднёвая Асеція і Абхазія — гэта рэгіёны Грузіі, акупаваныя Расіяй у выніку «вайны 08.08.08» у жніўні 2008 года. Гэтыя рэгіёны, як і «ДНР» з «ЛНР», правялі «рэферэндумы» аб самастойнасці ва ўмовах расійскай акупацыі, вынікі якіх не былі прызнаныя светам, у тым ліку і Беларуссю. Лукашэнку ўдавалася зацягваць гэтае «прызнанне» даволі доўгі час.




Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: