ЦВК: За чатыры дні датэрміновага галасавання на рэферэндуме прагаласавалі больш за траціну выбаршчыкаў

З 22 па 25 лютага ў рэферэндуме аб змяненні Канстытуцыі Беларусі, згодна з афіцыйным паведамленнем, узялі ўдзел 34,28% грамадзян, якія ўключаныя ў спісы выбаршчыкаў.


За чатыры дні датэрміновага галасавання на рэферэндуме нібыта прагаласавалі 34,28% грамадзян, якія ўключаныя ў спісы выбаршчыкаў.

Пра гэта паведаміла Цэнтральная камісія па выбарах і правядзенні рэспубліканскіх рэферэндумаў. Згодна з афіцыйнымі данымі, у Гомельскай вобласці прагаласавалі 38,81%, у Магілёўскай — 38,17%, Брэсцкай — 36,67%, Мінскай — 33,85%, Віцебскай — 33,82%, Гродзенскай — 31,31%. Найменшы адсотак прагаласаваўшых датэрмінова — у Мінску (28,61%).

Асноўны дзень галасавання — нядзеля, 27 лютага.

Перад датэрміновым галасаваннем улады правялі некалькі прэвентыўных затрыманняў грамадскіх актывістаў і агулам узмоцнілі хвалю ператрусаў, якія не спыняліся з другой паловы 2020 года.

З розных рэгіёнаў Беларусі прыходзяць паведамленні пра тое, што на датэрміновае галасаванне прымушаюць ісці студэнтаў і работнікаў бюджэтнай сферы.

Еўрасаюз не стаў накіроўваць у Беларусь місію для назірання за галасаваннем, бо не прызнае яго легітымным, Францыя выступіла з асобнай заявай датычна галасавання і сваёй пазіцыі.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: