«Дзеля справядлівасці, дзеля магчымасці зноў абняць сваю дачку я гатовы ісці да канца»

Палітыка

Ігар Лосік патлумачыў прычыну сваёй галадоўкі і звярнуўся да беларусаў. Яго зварот апублікаваны ў тэлеграм-канале «Беларусь головного мозга».

losik_ihar.jpg

«Я абвясціў галадоўку, таму што ў мяне больш не засталося ніякай магчымасці паўплываць на неабгрунтаваныя абвінавачванні і маё неправамернае знаходжанне пад вартай. Я несправядліва пазбаўлены волі і магчымасці ўбачыць сваю сям'ю.
Паўгода я ўжо прасядзеў у турме па абсурдным абвінавачванні ў злачынстве, для здзяйснення якога я павінен быў бы скарыстацца тэлепортам. У мяне было і ёсць алібі, але следства гэта паўгода ігнаравала.
За апошнія шэсць месяцаў я прапусціў вельмі шмат. Болей за ўсё крыўдна тое, што я не пачуў першыя словы сваёй дачкі.

Праз гэтыя паўгода мне прад'явілі яшчэ адно абсурднае абвінавачанне — падрыхтоўка да ўдзелу ў масавых беспарадках. Як гэта магчыма, калі да майго затрымання ні пра якія «масавыя беспарадкі» наогул гаворкі не ішло? Як гэта магчыма, калі ў гэты час увогуле не было вядома, чым скончыцца рэгістрацыя кандыдатаў у прэзідэнты?

Па версіі следства магчыма. Мабыць, з іх пункту гледжання я ўмею прадказваць будучыню альбо ў мяне ёсць машына часу.
Ды і за ўсё жыццё я ні разу не ўдзельнічаў ні ў адным «несанкцыянаваным» масавым мерапрыемстве, а ўжо тым больш масавых беспарадках. Якія масавыя беспарадкі з аднагадовай дачкой на руках?
Менавіта таму, добра ўсё абдумаўшы, узважыўшы ўсе «за» і «супраць», я адважыўся на такую ​​крайнюю меру, каб паспрабаваць дамагчыся справядлівасці.

Я аддаю сабе справаздачу, што ўслед за абвяшчэннем галадоўкі на мяне можа пачацца ціск: мяне могуць перавесці ў адзіночку ці ў карцар, пазбавіць асабістых рэчаў, лістоў, прэсы, зносін з адвакатам. Я аддаю сабе справаздачу ў тым, што магу займець сур'ёзныя праблемы са здароўем ці нават памерці. Дзеля справядлівасці, дзеля магчымасці зноў абняць сваю дачку я гатовы ісці да канца. Я ўсё яшчэ веру ў рэшткі сумлення тых людзей, якія кантралююць расследаванне гэтых ліпавых абвінавачванняў.


Я спадзяюся на падтрымку ўсіх неабыякавых беларусаў.
Я прашу падтрымкі ў міжнародных арганізацый, паслоў краін Еўрапейскага саюза ў Рэспубліцы Беларусь, урадаў дэмакратычных дзяржаў у прыцягненні ўвагі да абуральнай несправядлівасці, якая творыцца, і аднаўленні маіх правоў і правоў сотняў іншых палітычных вязняў.
Дапамажыце невінаватым вярнуцца дадому. Наша сям'я, як і сем'і іншых вязняў сумлення, ужо дастаткова напакутаваліся за апошні час.
Я спыню галадоўку толькі пасля зняцця з мяне ўсіх абвінавачванняў або змены мяне меры стрымання».
Нагадаем, палітзняволены Ігар Лосік абвясціў галадоўку 15 снежня. Да яе на знак салідарнасці з мужам далучылася яго жонка Дар'я. Сёння стала вядома, што яна спыніла галадоўку.