Freedom House: Беларусь — «найгоршая з найгоршых» у рэйтынгу свабоды

 У штогадовай справаздачы Freedom House Беларусь аднесеная да групы краін «найгоршыя з найгоршых» у дачыненні да палітычных і грамадзянскіх свабодаў нароўні з Кітаем,
Туркменістанам, Узбекістанам, Суданам і шэрагам афрыканскіх дэспатый.



Індэкс свабоды Беларусі складае — 6,5, індэкс палітычных свабодаў — 7, індэкс грамадзянскіх свабодаў — 6.
 
 
Расія і Казахстан аднесеныя да ліку «несвабодных краін». У Расіі гэтыя індэксы складаюць адпаведна 6,6 і 6 у Казахстане 5,5, 6 і 5. Усе іншыя суседзі Беларусі акрамя Расіі аднесены да свабодных краін: Польшча (1,1,1) Літва (1,1,1), Латвія (2,2,2), Украіна (3,3,3).
 
 
Расійскае ўварванне ва Украіну нанесла ў 2014 годзе зруйнавальны ўдар па дэмакратыі, гаворыцца ў штогадовым даследаванні міжнароднай няўрадавай арганізацыі Freedom House.
 
 
Міжнародная арганізацыя, якая базуецца ў ЗША, праводзіць даследаванні для падтрымкі дэмакратыі, палітычных свабодаў і правоў чалавека, адзначае, што тэракты і агрэсіўныя дзеянні аўтарытарных рэжымаў павялічылі «грэбаванне дэмакратычнымі стандартамі» амаль ва ўсіх рэгіёнах свету.
 
 
Адным з найгоршых узораў аўтары дакладу называюць «ўварванне Расіі ва Украіну, у тым ліку прамы захоп і анэксію Крыму».
 
 
Кажучы пра Украіну, даследчыкі адзначаюць, што станоўчыя зрухі, «звязаныя з адлучэннем ад улады карумпаванага прэзідэнта Віктара Януковіча», нівеліраваныя расійскай анэксіяй Крыму і ўзброеным супрацьстаяннем урадавых сіл і сепаратыстаў на ўсходзе краіны, якіх падтрымлівае Расія.
 
 
Украіна ў дакладзе ацэненая як «часткова свабодная» краіна. Што тычыцца акупаванага Расіяй Крыму, то сітуацыя ў ім ацэненая як «трохі лепшая», чым у Туркменістане і Узбекістане, якія сярод лідараў у ліку «несвабодных» краін.
 
 
Freedom House — міжнародная няўрадавая арганізацыя, якая праводзіць даследаванні для падтрымкі дэмакратыі, палітычных свабодаў і правоў чалавека. Арганізацыя стала вядомай дзякуючы даследаванням стану палітычных і грамадзянскіх свабодаў, якія пачалі праводзіцца з 1978 года.
 
 

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: