Каляды за кратамі, «экстрэмісцкія» старонкі і новыя «тэрарысты». Хронікі рэпрэсій 5 студзеня

Палітыка

Ліст Дзяніса Івашына з-за кратаў, статыстыка «экстрэмісцкага» спісу ў Беларусі за 2025 год і чарговае папаўненне «тэрарыстычнага спісу» — галоўнае за дзень.

1_1097_1.png

Палітзняволены журналіст-расследавальнік Дзяніс Івашын у лісце да блізкіх распавёў, як адзначыў Каляды за кратамі. Пра гэта напісала жонка вязня Вольга Івашына.

«Каляды я сустрэў з прыгожаю (як мне падаецца) ялінкаю-хваінкаю. Гэтым разам яна атрымалася ў мяне занадта пухмянаю, тоўсценькаю. З вялікаю Батлеемскаю зоркаю. Пакункі з дарункамі пад ёю я яшчэ не намаляваў. Але і гэтак зразумела, на які дарунак мы найбольш чакаем. Яго не загарнеш у святочную абгортку з прыгожымі бантамі. Вельмі спадзяюся, што наступная ялінка будзе насамрэч жывою і ставіць яе мы ўжо будзем разам. Давядзецца, праўда, яшчэ набываць упрыгожванні, але ж гэта прыемны працэс. Бо калядная ялінка мусіць быць выключна жывой».

Артыкулы Дзяніса Івашына ў «Новым Часе»

Што ў 2025 годзе ў Беларусі прызнавалі «экстрэмісцкімі матэрыяламі»?

Праваабаронцы «Вясны» падсумавалі «экстрэмісцкія» вынікі года.

На канец 2025 года «Рэспубліканскі спіс экстрэмісцкіх матэрыялаў» у Беларусі налічваў ужо 1928 старонак. Паводле інфармацыі «Вясны», усяго ў краіне прызналі 8172 матэрыялы «экстрэмісцкімі», з іх 2107 — у 2025 годзе.

У 2025 годзе «экстрэмісцкімі» прызналі:

  • 469 Telegram-каналаў і чатаў;
  • 411 Instagram-старонак;
  • 319 TikTok-акаўнтаў;
  • 222 старонкі і суполкі ў Facebook;
  • 143 старонкі і суполкі ў VK;
  • 118 YouTube-старонак;
  • 99 старонак і суполак у «Аднакласніках»;
  • 21 старонку ў X;
  • 4 старонкі ў Viber.

У прыватнасці, «экстрэмісцкімі матэрыяламі» былі прызнаныя старонкі музычнага гурта Naviband, Telegram-канал Беларускага ПЭНа, больш за 100 Telegram-стыкераў, старонка сайта «Вясны» са спісам беларускіх палітвязняў, кнігі і часопісы, сайт Канферэнцыі міжнародных няўрадавых арганізацый, старонкі палітвязняў і былых палітзняволеных, краўдфандынгавы праект Gronka, Instagram-старонка citydog_by, старонка ў Threads «Медиазона. Беларусь», YouTube-канал Delfi Литва, партал «Медыя-Палессе», TikTok pozirk_online ды іншыя.

Жыхара Гродна Сяргея Цвікевіча ўнеслі ў «спіс тэрарыстаў»

5 студзеня жыхара Гродна Сяргея Леанідавича Цвікевіча ўключылі ў «спіс тэрарыстаў». Раней яго ўжо ўнеслі ў «спіс экстрэмістаў», піша ТГ-канал Право имеют.

Цвікевіча судзілі ў Гродзенскім абласным судзе паводле двух артыкулаў:

— «заклікі да прычынення шкоды Рэспубліцы Беларусь» (ч. 3 арт. 361 КК);

— «распальванне варожасці» (ч. 1 арт. 130 КК).