Лукашэнка прапанаваў Аліеву шэраг новых кірункаў супрацоўніцтва Беларусі і Азербайджана
Шэраг новых кірункаў супрацоўніцтва Беларусі і Азербайджана прапанаваў Аляксандр Лукашэнка азербайджанскаму калегу Ільхаму Аліеву на перамовах у Мінску 28 лістапада, паведамляе belapan.by
Паводле слоў беларускага кіраўніка, у цяперашнім няпростым становішчы Беларусь і Азербайджан не дапусцілі прыкметнага зніжэння ўзаемнага тавараабароту. "Тым не менш час патрабуе ад нас хуткіх, эфектыўных рашэнняў для нарошчвання эканамічнага ўзаемадзеяння, у тым ліку і на рынках трэціх краін", — прыводзіць словы Лукашэнкі дзяржаўнае інфармагенцтва БелТА.
Ён прапанаваў разгледзець з удзелам дзелавых колаў Азербайджана кааператыўныя магчымасці ў сферы нафтахіміі, энергетыкі, сельскай гаспадаркі.
Таксама, заявіў Лукашэнка, беларускі бок можа прапанаваць недарагія, але надзейныя аўтобусы "МАЗ" малога і сярэдняга класа для ўдасканалення транспартных зносінаў, чыгуначныя
пасажырскія цягнікі, што выпускаюцца сумесна са швейцарскай кампаніяй "Штадлер", а для гарадскіх перавозак — камфартабельныя аўтобусы на экалагічных газагенератарных
рухавіках, зборку якіх можна наладзіць у Азербайджане.
Кіраўнік дзяржавы прапанаваў паслугі беларускіх спецыялістаў у далейшым удасканаленні транспартнай інфраструктуры Азербайджана. Да прыкладу, у праектаванні ліній і пастаўцы абсталявання для
арганізацыі руху хуткаснага гарадскога рэйкавага транспарту паміж цэнтрам Баку і яго прыгарадамі. У тым ліку ў забеспячэнні дадатковых камфортных умоў зносінаў з аэрапортам імя Гейдара
Аліева.
Лукашэнка таксама мяркуе, што істотныя рэзервы ёсць у развіцці сустрэчных паставак тытуню і цыгарэт. Паводле яго слоў, такія адносіны трэба ствараць на доўгатэрміновай аснове.
На думку беларускага кіраўніка, асаблівую актуальнасць у сучасным свеце мае сфера інфармацыйных тэхналогій і абароны інфармацыі. Таму, мяркуе ён, неабходна працягваць працаваць над пошукам сумесных
праектаў у гэтай сферы.
Паспяховым назваў Лукашэнка сумесны з Азербайджанам праект па зборцы беларускіх трактароў МТЗ, тэхнікі МАЗ і МЗКТ на Гянджынскім аўтамабільным заводзе. З 2007 года на яго плошчах сабрана больш як 6
тыс. трактароў "Беларус" і каля 3 тыс. аўтамабіляў і прычэпаў.
Лукашэнка выказаў надзею, што цяперашняя сустрэча на вышэйшым узроўні надасць дадатковы імпульс працэсу развіцця двухбаковага супрацоўніцтва, напоўніць яго новым канкрэтным зместам.
"Азербайджан быў і застаецца надзейным сябрам і партнёрам Беларусі, — падкрэсліў кіраўнік беларускай дзяржавы. — Мы высока цэнім нашу дружбу і гатовыя гэтак жа
шчыра і адкрыта садзейнічаць прасоўванню вашых інтарэсаў у Еўразійскім эканамічным саюзе, калі вам гэта будзе выгадна".