На парламенцкіх выбарах пачынаецца датэрміновае галасаванне

Сёння пачынаецца датэрміновае галасаванне на выбарах дэпутатаў Палаты прадстаўнікоў Нацыянальнага сходу Рэспублікі Беларусь шостага склікання.

Фота БЕЛТА

Фота БЕЛТА


На працягу пяці дзён выбарчыя ўчасткі будуць адкрыты для галасавання з 10 да 14 і з 16 да 19 гадзін.
У бюлетэнях для галасавання значыцца 491 кандыдат у дэпутаты. З іх 313 з`яўляюцца членамі палітычных партый, 115 — жанчыны, 28 — дэпутаты Палаты прадстаўнікоў дзеючага склікання, 35 — дэпутаты мясцовых саветаў.
За ходам галасавання будзе весціся досыць актыўнае міжнароднае і нацыянальнае назіранне. Па стане на 2 верасня Цэнтрвыбаркам зарэгістраваў 821 міжнароднага назіральніка. Найбольш масавымі з`яўляюцца місіі міжнародных назіральнікаў ад СНД і Бюро па дэмакратычных інстытутах і правах чалавека (БДІПЧ) АБСЕ, ад якіх акрэдытаваны адпаведна 331 і 341 чалавек. Пры выбарчых камісіях рознага ўзроўню, паводле дадзеных на 5 верасня, акрэдытавана 32.015 нацыянальных назіральнікаў.
У Беларусі ў ходзе датэрміновага галасавання выбарчыя ўчасткі наведвае досыць вялікая колькасць выбаршчыкаў. Так, на парламенцкіх выбарах 2012 года датэрмінова прагаласавала каля 25% выбаршчыкаў, на прэзідэнцкіх выбарах 2015 года — каля 36%.
Незалежныя назіральнікі лічаць, што падчас датэрміновага галасавання ўлады актыўна выкарыстоўваюць адміністрацыйны рэсурс для павышэння яўкі выбаршчыкаў. Акрамя таго, на іх думку, датэрміновае галасаванне — найбольш зручны час для фальсіфікацый, у прыватнасці шляхам укідвання выбарчых бюлетэняў у скрыні.
У нацыянальным назіранні будуць удзельнічаць прадстаўнікі як праўладных, так і незалежных структур. Незалежныя назіральнікі праводзяць кампаніі "Права выбару — 2016", "Праваабаронцы за свабодныя выбары", "За справядлівыя выбары".
Кампанія "Права выбару — 2016" падчас датэрміновага і асноўнага галасавання на парламенцкіх выбарах арганізуе назіранне на ўсіх участках для галасавання 11 выбарчых акруг: у Брэсцкай-Усходняй № 3, Віцебскай-Чкалаўскай № 18, Гомельскай-Цэнтральнай № 33, Гродзенскай-Цэнтральнай № 51, Сеніцкай № 76, Магілёўскай-Цэнтральнай № 85, Аўтазаводскай № 92, Чкалаўскай № 96, Дамброўскай № 103, Усходняй № 107, Каліноўскай № 108.
Кампанія "Праваабаронцы за свабодныя выбары" адкрыла гарачую лінію для паведамленняў аб парушэннях падчас парламенцкіх выбараў, якія прапаноўваецца адпраўляць на электронную скрыню ktn@spring96.org або праз форму зваротнай сувязі на сайце elections2016.spring96.org. Акрамя таго, падчас датэрміновага і ў асноўны дзень галасавання будзе працаваць тэлефонная лінія: з 5 па 14 верасня — з 9 да 21 гадзіны; 11 верасня — кругласутачна. Тэлефоны: для жыхароў Брэсцкай вобласці — 8 (29) 685-53-29; Віцебскай — 8 (29) 865-64-66; Гомельскай — 8 (29) 865-64-57; Гродзенскай — 8 (29) 865-64-21; Мінскай — 8 (29) 865-43-56; Магілёўскай — 8 (29) 865-64-40; Мінска — 8 (29) 865-64-26 і 8 (29) 865-64-25.
Асноўны дзень галасавання — 11 верасня. Выбарчыя ўчасткі ў гэты дзень будуць адкрыты з 8 да 20 гадзін.
Сяргей Каралевіч, БелаПАН