«Няма даверу». Украінская дэлегацыя больш не прыедзе ў Мінск для перамоў па Данбасе

Украінская дэлегацыя ў Трохбаковай кантактнай групе не будзе наведваць Мінск для непасрэдных перамоў і сустрэч. Пасля адмены каранціну неабходна шукаць іншую краіну. Пра гэта віцэ-прэм'ер-міністр — міністр па пытаннях рэінтэграцыі часова акупаваных тэрыторый Украіны Аляксей Рэзнікаў сказаў у эфіры праграмы «Свабода слова» на тэлеканале ICTV, перадае карэспандэнт «Укрінфарм».

«Мы катэгарычна паведамілі, што не будзем удзельнічаць у пасяджэннях Трохбаковай кантактнай групы, калі раптам завершыцца каранцін і будзе прапанавана працягнуць гэтыя кансультацыі, як раней, непасрэдна ў Мінску. Мы патлумачылі, што ўкраінская дэлегацыя не будзе накіроўваць сваіх членаў дэлегацыі ў Мінск для сустрэч у рэальным жыцці, усё роўна давядзецца шукаць іншую краіну, іншы горад», — сказаў Рэзнікаў.

Паводле яго слоў, паколькі цяпер Беларусь знаходзіцца пад уплывам Расійскай Федэрацыі, а таму даверу да гэтай краіны няма.