Святлана Ціханоўская да Дня вайсковай славы: Дух і праўда на баку тых, хто змагаецца за справядлівасць

Беларуская дэмакратычная лідарка Святлана Ціханоўская павіншавала суайчыннікаў з Днём беларускай вайсковай славы ў дзень 510-й гадавіны перамогі аб'яднаных войскаў Вялікага Княства Літоўскага і Каралеўства Польскага пад кіраўніцтвам гетмана Канстанціна Астрожскага над войскамі расійскай дзяржавы падчас вайны 1512-1522 гадоў.

«Сёння мы адзначаем Дзень беларускай вайсковай славы — дзень, калі наш народ здабыў адну з найслаўнейшых перамогаў у сваёй гісторыі. У 1514 годзе ў Аршанскай бітве нашыя продкі здолелі на доўгі час спыніць тыя ж самыя захопніцкія амбіцыі Расійскай дзяржавы, з якімі сучасны свет змагаецца сёння», — прыводзіць словы палітыка яе прэс-служба.

Як адзначыла Святлана Ціханоўская, менавіта Аршанская бітва «дапамагае памятаць істотную рэч: нават калі сілы няроўныя, дух і праўда на баку тых, хто змагаецца за справядлівасць. Сёння, як і тады, Беларусь сутыкаецца з пагрозай страціць незалежнасць. Але дастаткова пагартаць падручнікі нашай гісторыі, каб упэўніцца: народ заўсёды зможа даць адпор агрэсару, бо цэніць свабоду і ведае, якой цаной яна нам дасталася».

«Памятаць гісторыю неабходна, але ў нас ёсць і сучасныя героі: смелыя мужчыны і жанчыны, якія ваююць на франтах Украіны за свабоду не толькі гэтай краіны, але і за незалежнасць нашай Беларусі. Яны працягваюць справу тых, хто адстойваў нашую зямлю пяць стагоддзяў таму – змагаюцца з тым жа агрэсарам, што і нашыя продкі. Мэты ў гэтага агрэсара не змяніліся: захапіць нашую зямлю, знішчыць нашую мову, культуру і права жыць так, як мы самі хочам. Ён, як і 500 гадоў таму, забівае безабаронных, выпальвае ўсё да асновы. 

Я веру, што дух нашых продкаў жыве ў кожным з нас. І менавіта сёння кожны з нас можа рабіць унёсак у гэтую барацьбу — праз выхаванне дзяцей, вывучэнне мовы, дапамогу вайскоўцам ва Украіне»,— адзначыла яна. 

«Памятайце: як і 500 гадоў таму, праўда і справядлівасць на нашым баку. Таму мы абавязкова пераможам. Жыве Беларусь!» — заявіла Ціханоўская.

Паводле прэс-службы Святланы Ціханоўскай