Ветлівыя расійскія дроны, якіх тут няма. Ці ўжо ёсць?
Шахматная партыя, у якую гуляе Лукашэнка ўсё больш набліжаецца да цугцвангу. Ці дапаможа «саюзнік» выйсці з няёмкай сітуацыі, калі яго дроны ствараюць небяспеку для беларусаў?
Ілюстрацыйнае фота: «Reuters»
У ноч на чацвер дружалюбныя расійскія «шахеды» зноў нанеслі візіт у Гомельскую вобласць. Гэтым разам збіваць іх давялося проста над Гомелем. І многія гэта бачылі. Так што схаваць расійскія «шахеды» ў Беларусі гэтым разам не атрымалася. Праўда, у сваёй заяве беларускае Мінабароны паліткарэктна абышлося без указання нацыянальнай прыналежнасці парушальнікаў паветранай прасторы.
Але вызначацца з саюзнікам усё роўна давядзецца, піша Андрэй Бранішэўскі на «Plan B». Ці зноў тлумачыць пра «чырвоныя лініі». На якія наступаць нельга, але пераляцець або пераступіць можна.
Ну, не змагла
Пра тое, што два расійскія «шахеды» паляцелі ў бок Беларусі ўкраінскія ўлады паведамілі яшчэ ў сераду позна ўвечары. Пазней да іх дадалося як мінімум яшчэ два. Паводле звестак рэсурса «Беларускі гаюн», каб іх збіць у паветра давялося падымаць знішчальнікі. Як мінімум адзін шахед выбухнуў над Гомелем. Так што ў мясцовых пабліках гуляе зараз відэа выбухаў. Абломкі, паводле папярэдняй інфармацыі, упалі ў адным з раёнаў Гомеля.
Глядзіце таксама
Падобна да таго, расійскія «шахеды» ў Гомельскай вобласці становяцца рэгулярнай прыроднай з'явай. Ды і не толькі ў Гомельскай. У ноч на 13 ліпеня баявы дрон даляцеў да Віцебска, дзе Лукашэнка якраз у гэты час адкрываў «Славянскі базар».
Але да гэтага часу ў расійскіх «шахедаў» хапала пачуцця такту, каб не прыцягваць да сябе лішняй увагі. Так што беларускія ўлады маглі дазволіць сабе стратэгію страуса. Гэта значыць, рабілі выгляд, што з іх «чырвонымі лініямі» усё ў парадку. Што ніякіх расійскіх дронаў у беларускай прыродзе не існуе.
Замест гэтага Лукашэнка пахваліўся віртуальнай перамогай беларускага СПА над умоўнымі ўкраінскімі дронамі. З рэальнымі расійскімі дронамі ў беларускага СПА атрымліваецца спраўляцца значна горш. Ну, раз як мінімум адзін, а хутчэй за ўсё два, здолелі даляцець да Гомеля. Як піша «Беларускі гаюн», у чацвер у памежных раёнах Украіны шукалі неразарваныя ракеты, якімі СПА спрабавала гэтыя дроны збіваць.
Дарэчы, сістэма апавяшчэння, якую ўлады бесперапынна тэстуюць з часу апошняй залевы, не спрацавала. Таму што сістэма апавяшчэння павінна папярэджваць пра дажджы. А на іншыя прыродныя з'явы, кшталту залёту баявых дронаў, сістэма апавяшчэння не разлічана.
Ой, а хто гэта зрабіў?
«Сёння ноччу, 5 верасня, быў зафіксаваны факт парушэння дзяржаўнай мяжы Рэспублікі Беларусь у паветранай прасторы, як мяркуецца, беспілотнымі лятальнымі апаратамі», — заявіў намеснік камандуючага ВПС і войскамі СПА Сяргей Фралоў.
Факт нацыянальнай прыналежнасці дронаў намеснік камандуючага далікатна не стаў згадваць. І яго можна зразумець. Устанаўленне нацыянальнай прыналежнасці дронаў — занадта далікатнае геапалітычнае пытанне, каб яго можна было даверыць хоць намесніку, хоць камандуючаму.
Самы відавочны варыянт — абвясціць дроны украінскімі. Але тады зноў трэба будзе тлумачыць пра «чырвоныя лініі», на якія нельга наступаць, але пераляцець можна. Гэта добра тлумачыць, пакуль дроны нікуды не даляцелі. А калі даляцяць, то тлумачыць пра асаблівасці нацыянальнай гнуткасці «чырвоных ліній» будзе значна складаней.
Глядзіце таксама
І ёсць жа ўсе шанцы, што могуць даляцець. Таму што ў віртуальнай прасторы беларускія генералы, вядома, могуць даць адпор любому ўмоўнаму суперніку. Хоць дронам, хоць імперскім клонам. А ў жыцці ў іх атрымліваецца не так пераканаўча. То ракеты не выбухаюць, то сірэны не сігналяць, то самалёты не ўзлятаюць.
«Лепш быць беднымі, чым ваяваць», — сказаў Лукашэнка ў панядзелак з нагоды пачатку новага навучальнага года.
Вось, мяркуючы па паводзінах дружалюбных дронаў, у беларускіх уладаў ёсць вялікі шанец выйграць у абедзвюх намінацыях.