Асуджаны супраць кавід-дысідэнта. Лула да Сілва і Балсанару выйшлі ў другі тур прэзідэнцкіх выбараў у Бразіліі
Экс-прэзідэнт Бразіліі Луіс Інасіу Лула да Сілва абыходзіць у першым туры прэзідэнцкіх выбараў дзеючага лідара Жаіра Балсанару, абодва кандыдаты сустрэнуцца ў другім туры. Пра гэта сведчаць даныя апрацоўкі 99,99% пратаколаў.
Да Сілва злева, Балсанару справа
Паводле даных падліку, Лула да Сілва набірае 48,40%, у Балсанару — 43,22%.
Паколькі ніводзін з кандыдатаў не набраў больш за 50% галасоў, адбудзецца другі тур выбараў. Ён запланаваны на 30 кастрычніка.
У нядзелю ў Бразіліі адбыліся ўсеагульныя выбары, падчас якіх больш за 156 млн бразільцаў выбіралі прэзідэнта, губернатараў штата, парламентарыяў.
Жаір Балсанару — дзеючы прэзідэнт Бразіліі, ён спрабуе пайсці на другі тэрмін. Яму 67 гадоў, і ў мінулым ён, вайсковец і кангрэсмен, яшчэ да таго, як заняў пасаду прэзідэнта, быў вядомы ў Бразіліі сваімі выказваннямі ў адрас этнічных і сексуальных меншасцей і кабет, а таксама кансерватыўнымі поглядамі, ён неаднаразова выказваў настальгію па перыядзе ваеннай дыктатуры ў Бразіліі. Яго таксама называюць «кавід-дысідэнтам»: падчас разгару пандэміі каронавіруса ён часта называў вірус «невялікай прастудай» і заяўляў, што ўвядзенне каранціну і ў выніку гэтага згортванне ўсёй эканамічнай актыўнасці прынясе значна больш шкоды, чым усталяванне абмежаванняў толькі для жыхароў, якія знаходзяцца ў групе рызыкі.
Лулу да Сілве 76 гадоў. Ён кіраваў Бразіліяй з 2003 па 2010 год, у 2017 годзе яго асудзілі да дзевяці з паловай гадоў пазбаўлення волі за адмыванне грошай і карупцыю. Пазней тэрмін павялічылі да 12 гадоў. Сам ён сваёй віны ніколі не прызнаваў, яго адвакатам у выніку ўдалося абскардзіць прысуд. У 2021 годзе Вярхоўны суд краіны ануляваў яго прысуд па антыкарупцыйных справах. Цяпер ён можа зноў балаціравацца на выбарах. Гэта левы кандыдат.