Францыя. Вандалы вяртаюцца

У незвычайную сітуацыю трапіў парыжскі муніцыпалітэт, які з 2014 года праводзіць цікавы эксперымент.

Парыжанам прапануюць галасаваннем у інтэрнэце вызначыць, як мэрыя павінна выкарыстаць 5 працэнтаў гарадскога бюджэту.

На гэты раз жыхары французскай сталіцы падтрымалі ідэю выдаткаваць грошы на тое, каб… знесці царкву Святога сэрца, што лічыцца (поруч з Эйфелевай вежай і Трыумфальнай аркай) адным з сімвалаў Парыжу.

Царква Святога сэрца, або базіліка Сакрэ-Кёр (Basilique du Sacré Cœur), знаходзіцца ў папулярным турыстычным квартале Манмартр. Аб’ект будаваўся ў 1875–1914 гадах, у тым ліку як манументальны знак пакаяння за ўдзел парыжан у славутай Парыжскай камуне — адным з першых сацыялістычных выступаў у гісторыі.

Менавіта на гэты момант звяртаюць увагу аматары дэканструкцыі царквы. Калі ім верыць, царква Святога сэрца — гэта алегорыя рэпрэсій супраць парыжан, якія патрабавалі справядлівасці. Ідэя разбурыць царкву пакуль не знайшла падтрымкі ў ратушы, хаця там засядаюць сацыялісты.

Цікава, што гэта не адзіны замах у Еўропе на гістарычную спадчыну. У Лондане, дзе вельмі моцны дэфіцыт жылля, усё гучней чуваць заклікі знесці Букенгемскі палац — рэзідэнцыю манарха. Паводле падлікаў аматараў праекту, на месцы комплексу можна пабудаваць новы квартал, дзе будуць жыць каля 8000 чалавек.

Паводле французскай прэсы