«Хопіць карміць Маскву!» Яшчэ пяць расійскіх рэгіёнаў паднялі пытанне аб незалежнасці
У Расіі з 1 ліпеня пад лозунгам «Хопіць карміць Маскву!» стартуе другая частка Нацыянальнага анлайн-рэферэндуму па самавызначэнні. Цяпер прагаласаваць за суверэнітэт ці супраць яго могуць жыхары Чувашыі, Карэліі, Белгародскай, Наўгародскай і Варонежскай абласцей.
Галасаванне працягнецца два тыдні, да 15 ліпеня, а вынікі волевыяўлення абвесцяць да канца месяца, паведамляецца на спецыяльным сайце referendum2023.site.
Арганізатары апублікавалі падрабязную інструкцыю, як расійцу ўзяць удзел у рэферэндуме — для гэтага трэба зарэгістраваць пошту на серверы, які дапаможа абысці блакіраванне Раскамнагляду, і скарыстацца VPN.
Варта адзначыць, што з 16 па 28 лютага 2023 года ініцыятыўнымі групамі ўжо былі праведзены рэферэндумы аб незалежнасці пяці рэгіёнаў Расіі: Кёнігсберга (Калінінград і вобласць), Інгрыі (Санкт-Пецярбург і Ленінградская вобласць), Кубані (Краснадарскі край), Сібіры і Урала.
Вынікі анлайн-галасавання наступныя:
- Кёнігсберг: 72,1% за незалежнасць ад Масквы, 27,9% — супраць;
- Інгрыя: 66,2% за незалежнасць, 33,8% — супраць;
- Кубань: 55,7% за незалежнасць, 44,3% — супраць;
- Сібір: 63,9% за незалежнасць, 36,1% — супраць;
- Урал: 68,2% за незалежнасць, 31,8% — супраць.
«Масква рабуе па-бандыцку, злачынна рабуе тэрыторыю так званай РФ. Усе сродкі, якія здабываюцца на тэрыторыі РФ, пачынаючы ад фінансаў і заканчваючы сродкамі, што паступаюць ад здабычы рэсурсаў, ідуць у Маскву. Там яны трацяцца на меркаванне невялікай групы людзей на тое, што абсалютна нецікава для жыхароў так званай Расійскай Федэрацыі. Грашовыя сродкі трацяцца, у дадзеным выпадку, на вайну, на агрэсіўны напад на суверэнную незалежную Украіну, на знішчэнне мірных людзей, на знішчэнне інфраструктуры, на забойствы дзяцей», — казаў пра прычыны рэферэндуму прадстаўнік будучай незалежнай Сібіры.